İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 359 Hüküm no: 351 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan İsmaki v. Tanaş’ın bakkal dükkânının Domini bt. Yorgi’ye satıldığı Aksaray’da Kızılmusluk nâm mahâlde Hacı Ahmed dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde ber-vech-i âtî firâr eden İsmaki nâm zimmînin zevcesi olup şahsı ta‘rîf-i şer‘î ile mu‘arrefe olan işbu bâ‘isetü’s-sifr Domini bt. Yorgi nâm Nasrâniye muvâcehesinde bi’l-memûriye ikrâr-ı tam ve takrîr-i kelâm edip mahmiye-i İstanbul’da Aksaray kurbünde Kızılmusluk nâm mahâlde vâki‘ zikr olunan kırk yedi bâb dekâkin ve mağazalardan Hacı Ahmed dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr [olunur] âlât-ı lâzıme-i ma‘lûmenin yüz yirmi sehm i‘tibâriyle altmış sehmine mâlik mesfûre İsmaki v. Tanaş nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle âlât-ı lâzıme-i mezkûreden altmış sehm hisse-i merkūmesi cânib-i mîrîden zabt ve tüccâra nizâmları üzere alacakları içün [81b] terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i merkūmeden altmış sehm hisse-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin iki yüz guruşa mesfûre Domini Nasrâniye bi’l-memûriye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin iki yüz guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmuna teslîm eyledim fîmâ-ba‘d zikr olunan âlât-ı lâzıme-i ma‘lûme i‘tibâr-ı merkūm üzere altmış sehminde firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup mersûme Domini Nasrâniyenin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 Ca sene [1]238. Şühûdü’l-hâl: Eş-şâhidûne’s-sâbıkūn.