İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 360 Hüküm no: 352 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan Karakaş Yorgi v. Levangeli’nin bakkal dükkânının Ahmed Beşe b. Hüseyin ve Tarsi bt. Yani’ye satıldığı Kasımpaşa’da mumhâne ittisâlinde bakkāl Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bâ‘isü’r-rakīm Ahmed Beşe b. Hüseyin nâm kimesne tarafından husûs-ı âti’l-beyânı tasdîka vekîl-i şer‘îsi Kara Osman Beşe b. Yusuf nâm kimesne ile Tarsi bt. Yani nâm Nasrâniyenin zevci ve tarafından kezâlik husûs-ı âti’l-beyânı tasdîka vekîl-i şer‘îsi Yorgi v. Nikola nâm zimmî mahzarlarında bi’l-memûriye ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da mumhâne ittisâlinde vâki‘ zikr olunan kırk yedi bâb dekâkin ve mağazalardan ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmine mâlik olan Karakaş Yorgi v. Levangeli nâm zimmî bundan akdem vukū‘ bulan Rum tâifesi fesâdında medhali olduğuna binâen maktûlen hâlik olmağla âlât-ı lâzıme-i mezkûrede olan altmış sehm hisse-i merkūmesi cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i merkūmeden altmış sehm hisse-i şâyi‘ayı tarafeynden îcâb ve kabûlü [hâvî] şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin yüz guruşa müvekkil-i mezbûr Ahmed Beşe ile müvekkile-i mersûme Tarsi Nasrâniye’ye ale’l-iştirâki’s-seviyy bi’l-memûriye bey‘ ve temlik ve vech-i lâyıkı üzere her birine teslîm eylediğimde onlar dahi ber-vech-i muharrer iştirâken yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm bin yüz guruşu bana def‘ ü teslîm eylediklerinde ben dahi yedlerinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı merkūm üzere altmış sehminde cânib-i mîrî ve tüccâr ve esnâfdan kimesnenin alâka ve medhali kalmayup zikr olunan altmış sehmin otuz sehmi müvekkil-i mezbûr Ahmed Beşe’nin ve otuz sehmi müvekkile-i mersûme Tarsi Nasrâniye’nin mâl-ı müşterâları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 Ca sene [12]38. Şühûdü’l-hâl: Eş-şâhidûne’s-sâbıkūn.