İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 361 Hüküm no: 353 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Aci Esbir, Zoteri ve Yorgi’nin bakkal dükkânlarının Kara Hacı Mehmed Ağa b. Ali’ye satıldığı Fenerkapısı hâricinde Hasan Paşa dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-kitâb Kara el-Hâc Mehmed Ağa b. Ali nâm kimesne mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul hısnı ebvâbından Fenerkapısı hâricinde vâki‘ zikr olunan kırk yedi bâb dekâkin ve mağazalardan Hasan Paşa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm itibariyle iştirâken mâlikler olan Aci Esbir ve Zoteri ve Yorgi evlâd-ı Kanalu nâm zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle zikr olunan gedik ta‘bîr olunur âlât-ı lâzıme-i ma‘lûmeleri cânib-i mîrîden zabt ve tüccâra nizâmları üzere ber-vech-i muharrer alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere firârî-i mesfûrûnun iştirâken mâlikler oldukları zikr olunan gedik ta‘bîr olunur âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan beş bin beş guruşa mezbûr Kara el-Hâc Mehmed Ağa’ya bi’l-memûriye bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin beş guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede ber-mûceb-i kāime-i merkūme firârî-i mesfûrûnun ve cânib-i mîrî ve tüccâr ve esnâf-ı merkūmûndan kimesnenin alâka ve medhali kalmayup Kara el-Hâc Mehmed Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i R sene [1]238. Şühûdü’l-hâl: Eş-şâhidûne’s-sâbıkūn.