İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 362 Hüküm no: 354 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Todori v. Dimitri ve Manol v. Yorgi’nin bakkal dükkânlarının Ali Yazıcı b. Halil’e satıldığı Sultan Bâyezid’de göncüler kapısında Hacı Hüseyin Efendi dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ali Yazıcı b. Halil nâm kimesne mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da cennet-mekân merhûm-ı mağfiret-nişân Sultan Bâyezid-i Veli Han -tâbe serâhû- Câmi‘-i şerîfi kurbünde göncüler kapısında vâki‘ zikr olunan kırk yedi bâb dekâkin ve mağazalardan Hacı Hüseyin Efendi dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin otuz sehmden cem‘an altmış sehmine mâlikler olan Todori v. Dimitri ve Manol v. Yorgi nâm zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûreden mâlik oldukları altmış sehm cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere [82a] âlât-ı lâzıme-i merkūmeden altmış sehm hisse-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dört bin guruşa mezbûr Ali Yazıcı’ya bi’l-memûriye bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezbûr dört bin guruşu bana def‘ ü teslîm ben dahi bi’l-memûriye yedinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d zikr olunan âlât-ı lâzıme-i ma‘lûmenin i‘tibâr-ı merkūm üzere altmış sehminde firârî-i mesfûrânın ve cânib-i mîrî ve tüccâr ve esnâfından kimesnenin alâka ve medhali kalmayup mezbûr Ali Yazıcı’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 Ca sene [1]238. Şühûdü’l-hâl: Eş-şâhidûne’s-sâbıkūn.