İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 363 Hüküm no: 355 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Yorgi v. Todori ve Nikola v. Argiri’nin bakkal dükkânlarının Bakkal Avakim v. Mihal’e satıldığı Davudpaşa mahkemesi karşısında Hasan Ağa dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu hâmilü’r-rakīm Bakkāl Avakim v. Mihal nâm zimmî muvâcehesinde bi’l-memûriye ikrâr-ı tam ve takrîr-i kelâm edip mahmiye-i İstanbul’da Davudpaşa mahkemesi karşısında vâki‘ zikr olunan kırk yedi bâb dekâkin ve mağazalardan Hasan Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmine Yorgi v. Todori ve otuz sehmine Nikola v. Argiri ve otuz sehmine Annanosti v. Angeli nâm zimmîler mâlikler iken bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle mâlikler oldukları âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin iki yüz guruşa mesfûr Avakim zimmîye bi’l-memûriye bey‘ ve temlik ve teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı hâzırûn-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrûnun ve cânib-i mîrî ve tüccâr ve esnâfından kimesnenin alâka ve medhali kalmayup mesfûr Avakim zimmînin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 Ca sene [1]238. Şühûdü’l-hâl: Eş-şâhidûne’s-sâbıkūn.