İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 363 Hüküm no: 356 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Yorgi v. Manol ve Manol v. Yorgi’nin bakkal dükkânlarının Seyyid Mehmed Yazıcı b. Seyyid Halil’e satıldığı Bal Kapanında Yedikule dükkânı demekle ma‘rûf yağcı bakkāl Kezâlik hâzır oldukları hâlde meclis-i şer‘-i şerîf-i enverde mahmiye-i İstanbul Bal Kapanı tüccârından işbu bâ‘isü’l-kitâb es-Seyyid Mehmed Yazıcı b. es-Seyyid Halil mahzarında bi’l-memûriye ikrâr-ı tam ve takrîr-i kelâm edip zikr olunan Bal Kapanında vâki‘ sâlifü’l-beyân kırk yedi bâb dekâkin ve mağazalardan Yedikule dükkânı demekle şehîr ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yirmi dört sehmine Yorgi v. Manol ve altı sehmine Manol v. Yorgi ve yirmi beş sehmine diğer Yorgi v. diğer Manol nâm zimmîler cem‘an yüz sehmine ber-vech-i muharrer iştirâken mâlikler iken bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûreden cem‘an mâlikler oldukları yüz sehm hisseleri cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla âlât-ı lâzıme-i mezkûreden zikr olunan yüz sehm hisseyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan on üç bin beş yüz guruşa merkūm es-Seyyid Mehmed Yazıcı’ya bi’l-memûriye bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm on üç bin beş yüz guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı merkūm üzere yüz sehminde firârî-i mesfûrûnun ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr es-Seyyid Mehmed [Ya]zıcının mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 Ca sene [1]238. Şühûdü’l-hâl: Eş-şâhidûne’s-sâbıkūn.