İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 364 Hüküm no: 357 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari İstemat v. Dimitri’nin bakkal dükkânının Mahmud Ağa b. Mehmed’e satıldığı Samatya kurbünde Sulumanastır’da derzibaşı dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul Bal Kapanı tüccârından işbu bâ‘isü’l-kitâb el-Hâc Mahmud Ağa b. el-Hâc Mehmed mahzarında bi’l-memûriye ikrâr-ı tam ve takrîr-i kelâm edip mahmiye-i mezbûrede Samatya kurbünde Sulumanastır nâm mahâlde vâki‘ zikr olunan kırk yedi bâb dekâkin ve mağazalardan derzibaşı dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle müstakıllen mâlik olan İstemat v. Dimitri nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle mâlik olduğu âlât-ı lâzıme-i mezkûre cânib-i mîrîden [zabt] ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin yüz altmış guruşa mezbûr el-Hâc Mahmud Ağa’ya bi’l-memûriye bey‘ [82b] ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin yüz altmış guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr el-Hâc Mahmud Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 C sene [1]238. Şühûdü’l-hâl: Eş-şâhidûne’s-sâbıkūn.