İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 365 Hüküm no: 358 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari İsmaki v. Tanaş’ın bakkal dükkânının Domini bt. Yorgi’ye satıldığı Galata’da havyarhânı ittisâlinde Hanım dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde ber-vech-i âtî firâr eden İsmaki nâm zimmînin zevcesi olup şahsı ta‘rîf-i şer‘î ile mu‘arrefe olan işbu bâ‘isetü’s-sifr Domini bt. Yorgi nâm Nasrâniye muvâcehesinde bi’l-memûriye ikrâr-ı tam ve takrîr-i kelâm edip mahrûse-i Galata’da Havyar Hanı ittisâlinde kâin zikr olunan kırk yedi bâb dekâkin ve mağazalardan Hanım dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle kırk sehmine mâlik olan mesfûre İsmaki v. Tanaş nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle sâlifü’z-zikr kırk sehm hissesi cânib-i mîrîden zabt ve tüccâra nizâmları üzere ber-vech-i muharrer alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere firârî-i mesfûrun zikr olunan kırk sehm hissesini tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin guruşa mesfûre Domini Nasrâniye’ye bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin guruşu bana def‘ ü teslîm eylediğinde ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin ber-i‘tibâr-ı merkūm kırk sehminde ber-mûceb-i kāime-i mezkûre firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup mesfûre Domini Nasrâniye’nin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 C sene [12]38. Şühûdü’l-hâl: Eş-şâhidûne’s-sâbıkūn.