İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 366 Hüküm no: 360 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Yani v. Yorgi’nin bakkal dükkânının Mustafa Ağa b. Ömer’e satıldığı Avratpazarı’nda Mısırlı oğlu dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bâ‘isü’l-kitâb bakkālbaşı kapı Kethudâsı Mustafa Ağa b. Ömer tarafından husûs-ı âti’l-beyânı tasdîka vekîl-i şer‘îsi Süleyman Ağa b. İbrahim manzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Avratpazarı nâm mahâlde vâki‘ zikr olunan kırk yedi dekâkin ve mağazalardan Mısırlıoğlu dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle müstakıllen mâlik olan Yani v. Yorgi nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan üç bin guruşa müvekkil-i mezbûr Mustafa Ağa’ya bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup müvekkil-i mezbûr Mustafa Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 B sene [1]238. Şühûdü’l-hâl: Eş-şâhidûne’s-sâbıkūn.