İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 367 Hüküm no: 361 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Panayot, kızı Katerina, Kostandi ve Esbiro’nun bakkal dükkânının Abdullah Ağa b. Mehmed’e satıldığı Ayasofya’da Dörtyolağzı’nda Hacı Bekir dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde pirinç tüccârından işbu bâ‘isü’l-kitâb Abdullah Ağa b. Mehmed nâm kimesne mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Ayasofya kurbünde dört yolağzında vâki‘ mârrü’z-zikr kırk yedi bâb dekâkin ve mağazalarından Hacı Bekir dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle on sehmine Panayot zimmî ve yirmi sehmine mesfûrun kızı Katerina Nasrâniye ve otuz sehmine Kostandi zimmî ve altmış sehmine Esbiro zimmî mâlikler iken bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle firârî-i mesfûrun ber-vech-i meşrûh mâlikler oldukları zikr olunan âlât-ı lâzıme-i ma‘lûmenin mecmû‘u cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan üç bin iki yüz guruşa mezbûr Abdullah Ağa’ya bi’l-memûriye << yedinden ahz ve kabz >> bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin iki yüz guruşu bana def‘ ü teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrûnun ve cânib-i mîrî ve tüccâr ve esnâfdan kimesnenin alâka ve medhali kalmayup merkūm Abdullah Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i R sene [1]238. Şühûdü’l-hâl: Eş-şâhidûne’s-sâbıkūn.