İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 368 Hüküm no: 362 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Nikola v. Ademi’nin bakkal dükkânının Süleyman Ağa ve Hüseyin Ağa b. İsmail’e satıldığı Balık Pazarında kazasker dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bâ‘isü’l-kitâb kendi nefsinden asıl ve mahrûse-i Galata Yağ Kapanı tüccârından Hüseyin Ağa b. İsmail tarafından husûs-ı âti’l-beyânı tasdîka vekîl-i şer‘îsi kapan-ı merkūm nâzırı Süleyman Ağa b. el-Hâc Abdurrahman mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Balık Pazarı nâm mahâlde vâki‘ zikr olunan kırk yedi bâb dekâkin ve mağazalardan Kazasker dükkânı demekle şehîr ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan sehmine mâlik olan Nikola v. Ademi nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle zikr olunan gedik ta‘bîr olunur âlât-ı lâzıme-i ma‘lûmeden doksan sehm hissesi cânib-i mîrîden zabt ve tüccâra nizâmları üzere ber-vech-i muharrer alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere zikr olunan âlât-ı lâzıme-i ma‘lûmeden firârî-i mesfûrun i‘tibâr-ı merkūm üzere mâlik olduğu doksan sehm hisseyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan üç bin sekiz yüz elli guruşa asıl-ı mezbûr Süleyman Ağa ile müvekkil-i merkūm Hüseyin Ağa’ya ale’l-iştirâki’s-seviyy bi’l-memûriye bey‘ ve temlik ve vech-i lâyıkı üzere teslîm eylediğimde onlar dahi iştirâken yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin sekiz yüz elli guruşu bana def‘ ü teslîm eylediklerinde ben dahi bi’l-me’muriye yedlerinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede ber-mûceb-i kāime-i merkūme firârî-i mesfûrun ve cânib-i mîrî ve tüccâr ve esnâf-ı merkūmûndan kimesnenin alâka ve medhali kalmayup i‘tibâr-ı merkūm üzere kırk beş sehmi asıl-ı mezbûr Süleyman Ağa’nın ve kırk beş sehmi müvekkil-i mezbûr Hüseyin Ağa’nın mâl-ı müşterâları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i R sene [1]238. Şühûdü’l-hâl: Eş-şâhidûne’s-sâbıkūn.