İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 369 Hüküm no: 363 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler İlya, Dimitri, Yorgaki, Kostandi, Todori ve Mihalaki’nin iştiraken mâlik oldukları bakkal dükkânının Eyüb Alemdar ve kardeşi Ali Ağa b. Ali’ye satıldığı Balık Pazarında Karaca dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-kitâb Eyüb Alemdar ve karındaşı Ali Ağa b. Ali nâm kimesneler mahzarlarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Balık Pazarı nâm mahâlde kâin zikr olunan kırk yedi bâb dekâkin ve mağazalardan Karaca dükkânı demekle ma‘rûf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle iştirâken mâlikler olan İlya ve Dimitri ve Yorgaki ve Kostandi ve Todori ve Mihalaki nâm zimmîler [83b] bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle zikr olunan âlât-ı lâzıme-i ma‘lûmenin mecmû‘u cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i merkūmenin i‘tibâr-ı mezkûr üzere doksan sehmini on iki bin üç yüz yetmiş beş guruşa merkūm Eyüb Alemdar’a ve otuz sehmini dört bin yüz yirmi beş guruşa karındaşı mezbûr Ali Ağa’ya ki cem‘an ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan on altı bin beş yüz guruşa bi’l-memûriye bey‘ ve temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı mecmû‘-ı merkūm on altı bin beş yüz guruşu bana def‘ ü teslîm eylediklerinde ben dahi bi’l-memûriye yedlerinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede ber-mûceb-i kāime-i merkūme firârî-i mesfûrûnun ve cânib-i mîrî ve tüccâr ve esnâf-ı merkūmûndan kimesnenin alâka ve medhali kalmayup i‘tibâr-ı merkūm üzere doksan sehmi mezbûr Eyüb Alemdar’ın ve otuz sehmi karındaşı merkūm Ali Ağa’nın mâl-ı müşterâları olmuşdur dedikde gıbbe[’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i R sene [1]238. Şühûdü’l-hâl: Eş-şâhidûne’s-sâbıkūn.