İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 370 Hüküm no: 364 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Nikola v. Atam’ın yarım hisse bakkal dükkânının Aci Mihal v. İstirati’ye satıldığı Balık Pazarında Mîrâsyedi dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bakkāl tâifesinden işbu bâ‘isü’s-sifr Aci Mihal v. İstirati nâm zimmî muvâcehesinde bi’l-memûriye ikrâr-ı tam ve takrîr-i kelâm edip mahmiye-i İstanbul hısnı ebvâbından Balık Pazarı Kapısı hâricinde yemeniciler sûkunda kâin kırk yedi bâb dekâkin ve mağazalardan Mîrâsyedi dükkânı demekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmine mâlik iken bundan akdem vukū‘ bulan Rum tâifesi fesâdında medhali olup bundan akdem firâr eden Nikola v. Atam zimmînin mâlı olduğu hâlde firâr etmekle zikr olunan altmış sehm cânib-i mîrîden zabt ve tüccâra nizâmları üzere ber-vech-i muharrer alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere firârî-i mesfûrun zikr olunan altmış sehm hissesini tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dört bin yüz guruşa mesfûr Aci Mihal zimmîye bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm dört bin yüz guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı merkūm üzere altmış sehminde ber-mûceb-i kāime firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup mersûm Aci Mihal zimmînin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 R sene [1]238. Şühûdü’l-hâl: Eş-şâhidûne’s-sâbıkūn.