İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 370 Hüküm no: 365 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Hekim Yorgi v. Dimitri ve Bakkal Şişman Yorgi v. Atam’ın iştiraken mâlik oldukları bakkal dükkânının Tulumbacı Seyyid Hasan Ağa b. Osman’a satıldığı Odunkapısı hâricinde Hacı Mehmed dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul Bal Kapanı tüccârından işbu bâ‘isü’l-kitâb Tulumbacı es-Seyyid el-Hâc Hasan Ağa b. Osman bi’l-memûriye ikrâr-ı tam ve takrîr-i kelâm edip mahmiye-i mezbûre hısnı ebvâbından Odunkapısı hâricinde vâki‘ zikr olunan kırk yedi bâb dekâkin ve mağazalardan Hacı Mehmed dükkânı demekle şehîr ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle nısfiyet üzere iştirâken mâlikler olan Hekim Yorgi v. Dimitri ve Bakkāl Şişman Yorgi v. Atam zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle firârî-i mesfûrânın ber-vech-i muharrer iştirâken mâlikler oldukları zikr olunan âlât-ı lâzıme-i ma‘lûme cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a << bi’l-memûriye >> memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan on iki bin elli guruşa mezbûr Tulumbacı el-Hâc Hasan Ağa’ya bi’l-memûriye bey‘ temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm on iki bin elli guruşu bana def‘ ü teslîm eylediğinde ben dahi bi’l-memûriye yedinden ahz ü kabz [84a] ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr Tulumbacı es-Seyyid el-Hâc Hasan Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene [1]238. Şühûdü’l-hâl: Eş-şâhidûne’s-sâbıkūn.