İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 375 Hüküm no: 371 Orijinal metin no: [84b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Tarandafil v. Yorgaki ve Yorgi v. Zafiri’nin mâlik oldukları bakkal dükkânının Mustafa Ağa b. Ali’ye satıldığı Sultan Mehmed’de Nakīb dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul’da Bal Kapanı tüccârından bâ‘isü’l-kitâb el-Hâc Mustafa Ağa b. Ali mahzarında bi’l-memûriye ikrâr-ı tam ve takrîr-i kelâm edip mahmiye-i mezbûrede cennet-mekân firdevs-âşiyân merhûm-ı mağfiret-nişân Ebu’l-feth Sultan Mehmed Han -tâbe serâhû- Câmi‘-i şerîfi kurbünde vâki‘ zikr olunan kırk yedi bâb dekâkin ve mağazalardan nakīb dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuz sehmi mezbûr el-Hâc Mustafa Ağa’nın mâlı olup mâ‘adâ doksan sehminin otuz sehmine Tarandafil v. Yorgaki ve altmış sehmine Yorgi v. Zafiri nâm zimmîler mâlikler iken bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûreden doksan sehm hisseleri cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere zikr olunan âlât-ı lâzımeden doksan sehm hisselerini tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan beş yüz elli guruşa mezbûr el-Hâc Mustafa Ağa’ya bi’l-memûriye bey‘ ve temlik ve teslîm eylediğimde ol dahi ber-vech-i muharrer yedimden iştirâ ve temellük ve tesellüm ve kabûl ve semeni [olan] meblağ-ı merkūm beş yüz elli guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı mezkûr üzere otuz sehmi mukaddemâ mezbûr el-Hâc Mustafa Ağa’nın mâlı olup mâ‘adâ doksan sehminde dahi firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr el-Hâc Mustafa Ağa’nın mâl-ı müşterâtı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 24 B sene 1238. Şühûdü’l-hâl: Eş-şâhidûne’s-sâbıkūn.