İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 376 Hüküm no: 372 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Nikola v. Yani ve Yorgi v. Atam’ın nısfiyet üzere mâlik oldukları bakkal dükkânlarının Derviş Mehmed Ali Ağa b. Abdullah’a satıldığı Rüstempaşa Câmi‘i tahtında Hacı Mehmed dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bâ‘isü’l-kitâb el-Hâc Derviş Mehmed Ali Ağa b. Abdullah nâm kimesne tarafından husûs-ı âtiyyü’l-beyânı tasdîka vekîl-i şer‘îsi el-Hâc Mustafa Ağa b. Ali mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Tahtakale kurbünde Rüstempaşa Câmi‘-i şerîfi tahtında vâki‘ zikr olunan kırk yedi bâb dekâkin ve mağazalardan Hacı Mehmed dükkânı demekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle nısfiyet üzere iştirâken mâlikler olan Nikola v. Yani ve Yorgi v. Atam nâm zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan üç bin guruşa müvekkil-i mezbûr el-Hâc Derviş Mehmed Ali Ağa’ya bi’l-memûriye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup müvekkil-i mezbûr el-Hâc Derviş Mehmed Ali Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 24 B sene 1238. Şühûdü’l-hâl: Eş-şâhidûne’s-sâbıkūn.