Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 346 Hüküm no: 383 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Derviş için kayıp kocası üzerine nafaka takdiri Mahmiye-i İstanbul’da Yatağan mahallesinde sâkine olup zâtı ba‘de’t-ta‘rîfi’ş-şer‘î mu‘arrefe olan Sâliha bt. Derviş nâm hâtun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip gāib ani’l-meclis Sefer b. Mustafa nâm kimesne zevcim olup dört sene mukaddem beni bilâ-nafaka terk edip âhar diyâra gitmekle nafaka ve kisve ve sâir levâzım-ı mühimmesi için kıbel-i şer‘den zevcim gāib-i mezbûr Sefer üzerine kadr-i ma‘rûf akçe farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi ba‘de’t-tahlîfi’ş-şer‘î mezbûre Sâliha’nın nafaka ve kisve ve sâir levâzım-ı mühimmesi için târih-i kitâbdan yevmî altışar akçe farz ve takdîr edip meblağ-ı mezbûru kendi mesârifine harc ve sarfa ve lede’z-zarûre istidâneye ve inde’z-zafer zevci gāib-i mezbûr Sefer üzerine rücû‘a mezbûre Sâliha Hâtun’a izin vermeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, Ali b. Bâli, İbrahim Çelebi b. Ahmed, Ahmed b. Mehmed, Hasan b. Mehmed.