Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 347 Hüküm no: 384 Orijinal metin no: [61a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mehmed’in Mehmed Ağa b. Şaban’dan alacaklı olduğu Mahrûse-i Galata’ya tâbi‘ kasaba-i Kasımpaşa’da Tozkoparan mahallesinde sâkin Ahmed Çelebi b. Mehmed meclis-i şer‘-i şerîf-i enverde mahmiye-i İstanbul’da Davudpaşa mahallesinde sâkin Mehmed Ağa b. Şaban mahzarında üzerine da‘vâ ve takrîr-i kelâm edip gāib ani’l-meclis Ayaszâde demekle şehîr Ahmed Ağa zimmetinde cihet-i deyn-i şer‘îden yüz on guruş hakkım olmağla bundan akdem mezbûr Ahmed Ağa meblağ-ı mezbûr yüz on guruş için işbu Mehmed Ağa üzerine üçümüz bir mahalde iken havâle-i sahîha-i şer‘iyye ile havâle eyledikde her birimiz dahi havâle-i mezbûru kabûl etmekle meblağ-ı mezbûr min ciheti’l-havâleti’l-mezbûr merkūm Mehmed Ağa zimmetinde hakkım olmuş idi hâlâ merkūm Mehmed Ağa’ya suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mehmed Ağa cevâbında kaziyye minvâl-i meşrûh üzre olup meblağ-ı mezbûr yüz on guruşu havâle-i mezbûre cihetinden müdde‘î-i mezbûr[a] vâcibü’l-edâ ve lâzımü’l-kazâ zimmetinde deyni olduğunu ikrâr ve i‘tirâf etmeğin mûcebince meblağ-ı mezbûr yüz on guruşu müdde‘î-i mezbûr Ahmed Çelebi’ye edâ ve teslîme mezbûr Mehmed Ağa’ya tenbîh olunup mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed b. Ebûbekir, Süleyman b. Abdi, el-Hâc Mustafa b. Tevekkül, Ebûbekir b. Hüseyin, Ali b. Bâli.