İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 382 Hüküm no: 379 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Hıristo v. Atam’ın mâlik olduğu bakkal dükkânının Davud Ağa b. İbrahim’e satıldığı Nûr-ı Osmânî Câmi‘-i şerîfi kapısında Ahmed Çelebi dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul Bal Kapanı tüccârından bâ‘isü’l-kitâb el-Hâc Davud Ağa b. İbrahim tarafından husûs-ı âti’l-beyânı tasdîka vekîl-i şer‘îsi mahrûse-i Galata Yağ Kapanı Nâzırı Süleyman Ağa b. el-Hâc Abdurrahman mahzarında bi’l-memûriye ikrâr-ı tam ve takrîr-i kelâm edip mahmiye-i mezbûrede Nûr-ı Osmânî Câmi‘-i şerîfi kurbünde vâki‘ zikr olunan kırk yedi bâb dekâkin ve mağazalardan Ahmed Çelebi dükkânı demekle arîf ma‘lûmü’l-hudûd bir bâb dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmine mâlik olan Hıristo v. Atam nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle zikr olunan âlât-ı lâzıme-i ma‘lûmeden altmış sehm hissesi cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i mezkûreden altmış sehm hisse-i merkūmeyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin on guruşa mezbûr el-Hâc Davud Ağa’ya bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin on guruşu bana def‘ ü teslîm eylediğinde ben dahi yedinden tamamen bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı merkūm üzere altmış sehmine firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup müvekkile-i merkūm el-Hâc Davud Ağa’nın mâl-ı müşterâsı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 7 B sene [1]238. Şühûdü’l-hâl: Eş-şâhidûne’s-sâbıkūn.