İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 383 Hüküm no: 380 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Ananosti v. Anderya’nın mâlik olduğu yarım hisse bakkal dükkânının Saka Mehmed Alemdar b. Seyyid Hamza’ya satıldığı Altımermer kurbünde Meydancık nâm mahâlde Nurullah Ağa dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-kitâb Saka es-Seyyid Mehmed Alemdar b. es-Seyyid Hamza mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Altımermer kurbünde Meydancık nâm mahâlde vâki‘ zikr olunan kırk yedi bâb dekâkin ve mağazalardan Nurullah Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden yüz yirmi sehm i‘tibâriyle altmış sehm hisseye mâlik olan Ananosti v. Anderya nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle firârî-i mersûmun âlât-ı lâzıme-i mezkûreden mâlik olduğu hisse-i mersûmesi cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i merkūmeden i‘tibâr-ı mezbûr üzere altmış sehm hisse-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan üç yüz guruşa mezbûr Saka es-Seyyid Mehmed Alemdar’a bi’l-memûriye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz guruşu bana def‘ ü teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı merkūmuna teslîm eyledim fîmâ-ba‘d âlât-ı lâzıme-i mezkûrede firârî-i mersûmun ve cânib-i mîrî ve tüccâr ve esnâfdan kimesnenin alâka ve medhali kalmayup i‘tibâr-ı merkūm üzere altmış sehm mezbûr Saka es-Seyyid Mehmed Alemdar’ın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene 1238. Şühûdü’l-hâl: Eş-şâhidûne’s-sâbıkūn.