İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 383 Hüküm no: 381 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Kostandi v. Şayon ve Yorgi v. Ademi’nin mâlik olduğu yarım hisse bakkal dükkânının Sofya bt. Ligori’ye satıldığı Sultan Mehmed’de şekerci Hanı tahtında Kādıoğlu dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bâ‘isü’r-rakīm Sofya bt. Ligori nâm Nasrâniyenin zevci ve tarafından husûs-ı âti’l-beyânı tasdîka vekîl-i şer‘îsi Lefter v. Anaştaş nâm zimmî muvâcehesinde bi’l-memûriye ikrâr-ı tam ve takrîr-i kelâm edip mahmiye-i İstanbul’da cennet-mekân mağfiret-nişân Ebu’l-feth Sultan Mehmed Han -tâbe serâhû- Câmi‘-i şerîfi kurbünde Şekerci Hanı tahtında vâki‘ zikr olunan kırk yedi bâb dekâkin ve mağazalardan Kādıoğlu dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuz sehmden cem‘an altmış sehmine mâlikler olan Kostandi v. Şayon ve Yorgi v. Ademi zimmîler bundan akdem vukū‘ bulan Rum tâife[si] fesâdında medhalleri olduğuna binâen ikrârlarıyla firârî-i mersûmânın âlât-ı lâzıme-i mezkûreden i‘tibâr-ı merkūm üzere cem‘an mâlikler [oldukları] altmış sehm hisseleri cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i merkūmeden i‘tibâr-ı mezkûr üzere altmış sehm hisse-i mezbûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dokuz yüz guruşa müvekkile-i mersûme Sofya Nasrâniye[ye] bi’l-memûriye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm dokuz yüz guruşu bana def‘ ü teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı merkūmuna def‘ ü teslîm eyledim fîmâ-ba‘d âlât-ı lâzıme-i mezkûrenin i‘tibâr-ı merkūm üzere altmış sehminde firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup müvekkile-i mesfûre Sofya Nasrâniyenin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 Ca sene [1]238. Şühûdü’l-hâl: Eş-şâhidûne’s-sâbıkūn.