İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 384 Hüküm no: 382 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Yorgi v. Atam ve Dimitri v. Panayot’un nısfiyet üzere mâlik oldukları bakkal dükkânının Hafız İbrahim Ağa b. Seyyid Ahmed Alemdar’a satıldığı Zindân kapısında Canbaz Hanı ittisâlinde yeni dükkân Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul’da Bal Kapanı tüccârından işbu bâ‘isü’l-kitâb es-Seyyid el-Hâc Hafız [İbrahim] Ağa b. es-Seyyid el-Hâc Ahmed Alemdar mahzarında bi’l-memûriye ikrâr-ı tam ve takrîr-i kelâm edip mahmiye-i mezbûre hısnı ebvâbından Zindân kapısı dâhilinde Canbaz Hanı ittisâlinde vâki‘ zikr olunan kırk yedi bâb dekâkin ve mağazalardan Yeni dükkânı demekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle nısfiyet üzere iştirâken mâlikler olan Yorgi v. [A]tam ve Dimitri v. Panayot nâm zimmîler bundan akdem vukū‘ bulan Rum tâifesi fesâdında ve medhalleri olduğuna binâen firâr etmeleriyle mâlik oldukları âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i merkūmeyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâ[hir] olan yedi bin dört yüz guruşa es-Seyyid el-Hâc Hafız İbrahim Ağa’ya bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm yedi bin dört yüz guruşu mezbûr es-Seyyid el-Hâc Hafız İbrahim Ağa bana def‘ ve teslîm eylediğinde ben dahi yedinden bi’l-memûriye ahz ü kabz ve tüccâr ve esnâf-ı merkūmuna teslîm eyledim fîmâ-ba‘d âlât-ı lâzıme-i mezkûrede firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr es-Seyyid el-Hâc Hafız İbrahim Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 B sene [1]238. Şühûdü’l-hâl: Eş-şâhidûne’s-sâbıkūn.