Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 348 Hüküm no: 385 Orijinal metin no: [61a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. İstemat’ın veraset işleri için Eskopi v. Mosko’yı vekil tayin ettiği Hâslar kazâsına tâbi‘ Karka nâm karyede sâkin iken bundan akdem hâlik olan İstemat v. Zaharya’nın verâseti sulbî kebîr oğlu Dimitri ile kebîre kızı Maryora ve zevce-i menkûhası Sultana nâm nasrâniyeye münhasıra olduğu şer‘an zâhir ve müte‘ayyin oldukdan sonra mezbûr Dimitri meclis-i şer‘-i şerîf-i enverde işbu bâ‘isü’l-vesîka Eskopi v. Mosko nâm zimmî muvâcehesinde ikrâr ve takrîr-i kelâm edip baba hâlik-i mezbûrun terekesinden bi’l-irsi’ş-şer‘î bana isâbet eden hisse-i şer‘iyyemi tereke-i hâlik-i mezbûra vaz‘-ı yed eden hemşîrem mezbûre Maryora ile zevci Yamandi nâm zimmîden taleb ve da‘vâ ve ahz u kabz ve bana îsâle ve ahz u kabz ve îsâle mütevakkıf olduğu umûrun küllîsine mezbûr Eskopi’yi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûre[yi] kabûl ve hizmet-i lâzımesini kemâ yenbağī edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed (…), Mehmed b. Abdullah, Mustafa Çelebi.