İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 385 Hüküm no: 383 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Vetkelo ve Nikola’nın nısfiyet üzere mâlik oldukları bakkal dükkânının Seyyid Mustafa Raşid Ağa b. Mehmed Emin Ağa ve Mehmed Ağa’ya satıldığı Rüstempaşa Câmi‘i ittisâlinde Hacı Halil dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul’da Bal Kapanı tüccârından işbu bâ‘isü’l-kitâb es-Seyyid Mustafa Râşid Ağa b. el-Hâc Mehmed Emin Ağa b. Hüseyin nâm kimesneler mahzarında bi’l-memûriye ikrâr-ı tam ve takrîr-i kelâm edip mahmiye-i mezbûrede Tahtakale kurbünde Rüstempaşa Câmi‘-i şerîfi [şa]dırvanı ittisâlinde vâki‘ zikr olunan kırk bâb dekâkin ve mağazalardan Hacı Halil dükkânı demekle arîf ma‘lûmü’l-hudûd bir bâb yağcı ve bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle nısfiyet üzere iştirâken babalarından mevrûs mâlları olmak üzere mâlikler olan Vetkelo ve Nikola zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle firârî-i mesfûrânın ber-vech-i muharrer iştirâken mâlikler oldukları zikr olunan âlât-ı lâzıme-i ma‘lûme cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan altı bin altı yüz elli guruşa ale’l-iştirâki’s-seviyy mezbûrân es-Seyyid Mustafa Râşid Ağa ve Mehmed Ağa’ya bi’l-memûriye bey‘ ve temlik ve teslîm eylediğimde onlar dahi ber-vech-i muharrer iştirâken yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm altı bin altı yüz elli kuruşu bana def‘ ü teslîm eylediklerinde ben dahi yedlerinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup i‘tibâr-ı merkūm üzere altmış sehmi mezbûr es-Seyyid Mustafa Râşid Ağa’nın ve altmış sehmi merkūm Mehmed Ağa’nın mâl-ı müşterâları olmuşdur dedikde gıbbe’t-tasdîk [i’ş-şer‘î mâ-vaka‘a bi’t-taleb ketb olundu.] Fî 21 Ca sene [1]238. Şühûdü’l-hâl: Eş-şâhidûne’s-sâbıkūn.