İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 38 Hüküm no: 4 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram v. Yuvan’ın kazzaz gediğini, Mişon v. Avram’a devrettiği Kazzâz mübâya‘ası ve ismine tashîh Ma‘rûz Kazzâz esnâfından Avram v. Yuvan nâm yahudi meclis-i şer‘-i enverde yine esnâf-ı merkūmeden Mişon v. Avram nâm yahudi mahzarında takrîr-i kelâm edip İstanbul’da Çarşı-yı Kebîr’de Takyeciler sûkunda kazzâz Atrayil? v. İsak ve Saçakçı Rafayil v. Yako yahudiler dükkânları beyninde kâin her bir kepengi birer gedik i‘tibâriyle iki kepenk bir bâb kazzâz dükkânı derûnunda mevcûde iki aded kazzâz gediğinden mersûm Rafayil dükkânına muttasıl bir kepengi müştemil bâ-sûret yedimde müstakillen malım olan bir gedik i‘tibâr olunan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safka-i vâhide dört bin guruş semen-i makbûza mesfûr Mişon yahudiye bey‘ ve temlîk ve teslîm eylediğimde ol-dahi ber-vech-i muharrer yedimden iştirâ ve temellük ve tesellüm ve kabz ve kabûl-birle mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî sahîhan ibrâ ve ıskāt eyledik ba‘de’l-yevm gedik-i [2b] mezkûrda benim alâkam kalmayıp mersûm Mişon’un mal-ı müşterâsı olmuşdur deyu ba‘de’l-ikrâr ve’t-tasdîk zikr olunan bir aded gediğin mersûm Avram yahudi ismine olan kaydı ref‘ ve terkīn ve kendi ismine kayd ile yedine bir kıt‘a sûret i‘tâsı bâbında müşterî-i mersûm Mişon yahudi istid‘â-yı inâyet eylediği İstanbul Mahkemesi’nden huzûr. Fî 17 L sene [1]241