İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 38 Hüküm no: 5 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersiâm Mehmed Esad Efendi’nin, evi önündeki ekmek tablasının kaldırılmasını talep ettiği Müderrisîn-i kirâmdan Dersiâm Mehmed Esad Efendi’nin menzili önüne nân-ı azîz tablası vaz‘ etmemeğe ta‘ahhüd Ma‘rûz Müderrisîn-i kirâm-ı zevi’l-ihtirâmdan Dersiâm İmâmzâde Hoca Hâfız Mehmed Esad Efendi ibnü’l-merhûm el-Hâc Hâfız Ahmed Efendi’nin Bâb-ı Âlî’ye takdîm eylediği işbu arzuhâli bâlâsına bî-vech-i şer‘î mazarratını def‘ ve iktizâsını i‘lâm eyleyesin deyu bu dâ‘îlerine hitâben sâdır olan fermân-ı cihân-mutâ‘a imtisâlen mûmâ-ileyh Hâfız Mehmed Esad Efendi meclis-i şer‘-i münîrde Âsitâne-i aliyyede vâkı‘ habbâzân tâifesinden derûn-ı arzuhâlde mastûru’l-ism Saraçhânebaşı fırını ustası İsmail Usta b. Mehmed kimesne muvâcehesinde habbâzân kethüdâsı Mehmed Hoca b. Ali hâzır olduğu halde fırın-ı merkūm ustası mezbûr İsmail Usta bir nefer tablakârını küllü yevm İstanbul’da Saraçhânebaşı kurbünde Mimar Ayas mahallesinde İbrahim Paşa Hamamı kapısı karşısında bi’l-icâreteyn müstakillen mutasarrıf olduğum menzilim kapısı önüne irsâl ve tablasını tarîk-i âmma vaz‘ ettirip ol-vechile benim menzil-i mezkûra duhûl ve hurûcuma ve sâir mârreye zarâr olmağla tabla-i mezkûreyi tarîk-i merkūmdan ref‘ ve fî-mâ-ba‘d tablakâr irsâliyle mahall-i mezbûra hilâf-ı şer‘-i şerîf tabla vaz‘ıyla bana ve sâir mârreye olan mazarratı men‘ ve def‘ olunmak üzere mezbûr İsmail Usta’ya tenbîh olunmak murâdımdır dedikde evvelen sicillât tetebbu‘ olundukda bin-yüz yetmiş altı senesi Zilhiccesi’nin yirminci günü târihiyle İstanbul kādısı esbak merhûm Mehmed Emin Âtıf Efendi sicillinde Âsitâne-i aliyyede vâkı‘ fırınların merbût oldukları iskemleleri mahalleri tasrîhiyle mukayyed olup lâkin fırın-ı mezkûrun kat‘an merbût iskemlesi olmadığından mezkûr olmayıp fakat bin-yüz doksan dört senesi Ramazânı’nın üçüncü günü târihiyle merhûm Dürrîzâde es-Seyyid Mehmed Ârif Efendi sicillinde fırın-ı mezkûrun dört aded tablası mukayyed ise de tabla-i mezkûrelerin mahalleri mu‘ayyen olmadığı merkūm İsmail Usta’ya tefhîm ve tablakârlar esvâk ve bâzâr ve mahallât aralarında geşt ü güzâr ederek ibâdullâha nân-ı azîz bey‘iyle ta‘ayyüş edegeldiklerini kethüdâ-yı hâzır-ı mezbûr Mehmed Hoca ihbâr ve merkūm İsmail Usta dahi tasdîk ve fi’l-hakīka bir nefer tablakârını küllü yevm tarîk-i âmm-ı mezkûra irsâl ve tablasını vaz‘-birle gerek müdde‘î-i mûmâ-ileyhe ve gerek sâir mârreye zarârını ikrâr ve i‘tirâf ve fî-mâ-ba‘d mahall-i mezkûra hilâf-ı şer‘-i şerîf ve mugāyir-i kānûn-ı münîf tabla vaz‘ıyla gerek müdde‘î-i mûmâ-ileyhe ve gerek sâir mârreye mazarrat etmemek üzere müte‘ahhid olduğu İstanbul Mahkemesi’nden huzûr. Fî 17 L sene [1]241