İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 39 Hüküm no: 6 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. Agop’un kazzaz gediğini, Aleko v. Panayot’a devrettiği Kazzâz mübâya‘ası Ma‘rûz Âsitâne-i aliyyede vâkı‘ kazzâz esnâfından Avanes v. Agop zimmî meclis-i şer‘-i enverde esnâf-ı merkūmeden hâmilü’l-i‘lâm Aleko v. Panayot zimmî muvâcehesinde takrîr-i kelâm edip İstanbul’da Çarşı-yı Kebîr’de bezzâzistân-ı atîk civârında Çakır Ağa sûkunda kâin kazzâz Kirkor ve Nikola dükkânları beynlerinde vâkı‘ bir kepenk bir bâb kazzâz dükkânı derûnunda mevcûde beyne’l-esnâf gedik ta‘bîr olunur mukayyed ve mu‘teber akd-i âtiyyü’z-zikrin sudûruna değin bâ-sûret müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safka-i vâhide dört bin guruş semen-i makbûza mesfûr Aleko zimmîye bey‘ ve temlîk ve teslîm eylediğimde ol-dahi ber-vech-i muharrer iştirâ ve temellük ve tesellüm ve kabz ve kabûl etmekle mebî‘-i mezkûrun gabn ve tağrîrine müte‘allıka âmme-i da‘vâdan tarafeynden her birimiz âharın zimmetini ibrâ-i âmm-i sahîh-i şer‘î ile kabûlü hâvî ibrâ ve ıskāt dahi etmemizle ba‘de’l-yevm âlât-ı gedik-i mezkûr mersûm Aleko zimmînin mülk-i müşterâsı ve hakk-ı [3a] sarfı olup benim aslen ve kat‘an alâka ve medhalim kalmamışdır deyu ba‘de’l-ikrâr ve’t-tasdîk gedik-i merkūmun kaleminde bâyi‘-i mersûm Avanes zimmî üzerinde olan kaydı ref‘ ve terkīn ve müşterî-i mersûm Aleko zimmînin ismine tasrîhan kayd ile yedine müceddeden bir kıt‘a sûret i‘tâsını mersûm Aleko zimmî istid‘â eylediği İstanbul Mahkemesi’nden huzûr. Fî 22 L sene [1]241