İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 46 Hüküm no: 14 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı Kaplan v. Yorgi’nin Şerbetçi Kostandi v. Vasil’e olan borcunu ödeyemediğinden hapsedildiği İflâs hükmü Ma‘rûz Sâdır olan fermân-ı âlîlerine imtisâlen arzuhâlde mastûr derkenâr nâtık olduğu üzere Şerbetçi Kostandi v. Vasil zimmîye bâ-i‘lâm-ı şer‘î mahkûmun-bih deyni olan üç-bin iki-yüz elli guruşun tahsîli’çün dokuz aydan beri Muhzır ağa tomruğunda mahbûs olup mahbûsen arzuhâl eden Havyarcı Kaplan v. Yorgi zimmî meclis-i şer‘-i münîrde dâyin-i mersûm Kostandi zimmî muvâcehesinde ben fakīr ve müflis ve mu‘dim olup üzerime lâbis olduğum köhne libâsımdan gayrı ism-i mal ıtlâk olunur nesnem olmadığından deyn-i mezkûrumu bir vechile edâya kudretim olmamağla si‘a-i hâle vusûlüme değin habsden ıtlâk ve sebîlim tahliye olunmak matlûbumdur deyu asârını da‘vâ ettikde dâyin-i mersûm Kostandi zimmî mahbûs-ı mesfûrun yesârını isbâta kādir olamamağla mahbûs-ı mesfûr ber-vech-i muharrer müflis ve mu‘assir olduğunu lede’t-tezkiyye makbûlü’ş-şehâde idükleri ihbâr olunan bakkal Yuvan v. Kiryako ve Filipos v. Nikola ve Sava v. Kaplan ve Arzuman v. Yoseb ve İstafor v. Todori nâm zimmîler şehâdetleriyle bi’l-müvâcehe vech-i şer‘î üzere isbât ettikden sonra mersûm Kostandi zimmî dahi ikrâr ve tasdîk edip mûcebiyle iflâsına hükm olunmağın bu sûretde medyûn-ı mersûm Kaplan zimmînin yesârı sâbit olmadıkca habsi meşrû‘ olmamağla bilâ-kefîl habsden ıtlâk ve sebîli tahliye olunmak muktezâ-yı şer‘-i şerîf idüğü İstanbul Mahkemesi’nden huzûr. Fî 11 L sene [1]241