İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 47 Hüküm no: 15 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hüseyin Ağa b. Hasan’ın, es-Seyyid Hüseyin Çavuş b. Mehmed Emin’de alacağı olduğu 1425 guruş ilzâmı Ma‘rûz Âsitâne-i aliyyede vâkı‘ Zeytin Bahçesi esnâfı kethüdâsı el-Hâc Hüseyin Ağa b. Hasan meclis-i şer‘-i münîrde Dîvânhâne-i Âmire çavuşlarından sâhib-i arzuhâl es-Seyyid Hüseyin Çavuş b. Mehmed Emin muvâcehesinde işbu yedimde olup iki-yüz otuz dokuz senesi Recebi’nin on yedinci günü târihiyle müverrah bir kıt‘a temessük nâtık olduğu üzere mezbûr es-Seyyid Hüseyin Çavuş zimmetinde yedimden ve malımdan iktirâz ve kabz eylediği bin-yüz yetmiş beş guruş ve yedimden ve malımdan iştirâ ve kabz eylediği ma‘lûmü’l-vezn ve’l-fiy’ât zeytin yağı semeninden elli altı guruş ve oğlum gāib ani’l-meclis Hasan Efendi’nin mezbûr es-Seyyid Hüseyin Çavuş zimmetinde alacağı ve benim-dahi oğlum mezbûr zimmetinde alacağım olup cümlemiz bir meclisde hâzır olduğumuz hâlde havâle-i mukayyede ile mezbûr es-Seyyid Hüseyin Çavuş üzerine kabûlü hâvî havâle olunan iki-yüz guruş ki min-haysü’l-mecmû‘ [5b] hakkım olan bin dört-yüz otuz bir guruşu merkūm es-Seyyid Hüseyin Çavuş’dan hâlâ taleb ederim deyu da‘vâ ettikde ol-dahi cevâbında kaziyye minvâl-i muharrer üzere olup cihât-ı mezkûreden meblağ-ı mecmû‘-ı merkūm bin dört-yüz otuz bir guruş zimmetinde müdde‘î-i mezbûr el-Hâc Hüseyin Ağa’ya sahîhan deyni olduğunu tâyi‘an ve kat‘iyyen ikrâr ve i‘tirâf edip lâkin ben otuz yedi senesi donanma-i hümâyûn ile Akdeniz cânibinde iken mezbûr el-Hâc Hüseyin Ağa’nın bana irsâl eylediği bir kıt‘a mektûbunda bir re’s Rum câriye gönderesin deyu tahrîr etmekle ben-dahi tahrîr ve tavsîfi üzere tahmînen sekiz yaşında elâ gözlü çiçek bozuğu sarışın bir câriyem ile min gayrı tahrîr üç-bin guruş kıymetli tahmînen on yaşında bir re’s gulâmımı mezbûr el-Hâc Hüseyin Ağa’ya gönderip câriye-i mezbûre el-yevm yedinde olduğu mesmû‘um olmağla câriye-i mezbûre bey‘e arz olunup kıymeti neye bâliğ olur ise ol-mikdâr ile zikr olunan gulâmın kıymet-i mezkûresi deyn-i merkūma mahsûb olunsun dedikde istikşâf-ı hâl için mezbûr el-Hâc Hüseyin Ağa istintâk olundukda merkūm es-Seyyid Hüseyin Çavuş’un oğlum gāib-i mezbûr ile ba‘zı gulâm ve câriyeye dâir beynlerinde mu‘âmele cereyân eylediği mesmû‘um olmuş ise de henüz keyfiyyeti dahi ma‘lûmum olmayıp benim ile kat‘an o makūle mu‘âmele vukū‘ bulmamış-idi deyu husûs-ı mezkûru külliyen inkâr etmeğin bu sûretde merkūm es-Seyyid Hüseyin Çavuş’un kelâmı bu mertebe ile müvecceh olmayıp vech-i şer‘î üzere tashîh-i da‘vâya havâle olunmağla sâlifü’z-zikr ikrâr ve i‘tirâfıyla lâzım gelen meblağ-ı merkūm bin dört-yüz otuz bir guruşun müdde‘î-i mezbûr el-Hâc Hüseyin Ağa’ya tamâmen edâ ve teslîmiyle merkūm es-Seyyid Hüseyin Çavuş şer‘an ilzâm olunduğu İstanbul Mahkemesi’nden huzûr. Fî 17 L sene [1]241