İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 48 Hüküm no: 16 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Halil Ağa b. el-Hâc Ahmed’in es-Seyyid Mehmed Eşref Usta’ya verdiği sözlü ortaklık vaadinin geçersiz olduğu Çörekçi şirketliği men‘i Ma‘rûz Âsitâne-i aliyyede vâkı‘ çörekçi esnâfından el-Hâc Halil Ağa b. el-Hâc Ahmed nâm kimesne meclis-i şer‘-i münîrde esnâf-ı merkūmeden derûn-ı arzuhâlde ismi mezkûr es-Seyyid Mehmed Eşref Usta b. Mehmed muvâcehesinde esnâf-ı merkūme kethüdâsı Abdullah Ağa ve Yiğitbaşısı Ahmed Alemdâr ve Yazıcısı Ali Efendi ve ihtiyârlarından Ahmed Usta ve Mehmed Usta ve İbrahim Usta ve Hasan Usta ve Ali Usta ve Mustafa Usta ve sâirleri hâzır oldukları hâlde hâmiş-i arzuhâlde mastûr İstanbul Mahkemesi sicillinden muhrec i‘lâm kaydı ve baş-muhâsebe ve defter-i vakf derkenârları nâtık olduğu üzere İstanbul hısn-ı ebvâbından Kapan-ı Dakīk kapısı dâhilinde köşede vâkı‘ ma‘lûmü’l-hudûd ve’l-müştemilât bir kıt‘a vakıf çörekçi fırını bâ-temessük-i mütevellî bi’l-icâreteyn benim taht-ı tasarrufumda ve derûnunda mevcûde beyne’l-esnâf gedik ta‘bîr olunur mukayyed ve mu‘teber âlât-ı lâzıme-i ma‘lûme dahi mezbûr es-Seyyid Mehmed Eşref Usta’nın babasından mevrûs mülkü olarak fırın-ı mezkûrda müste’cirim olup lâkin mezbûr es-Seyyid Mehmed Eşref Usta bundan sonra kendime gayrısını şerîk etmeyip seni teşrîk ederim demiş-iken âhar kimesneyi kendine şerîk edip ol-vechile ben fırın-ı mezkûrun ticâretinden mahrûm kalmamla öyle olıcak ben mücerred fırın-ı mezkûrun mülk sâhibi olup şirkete münâsebetim olduğuna binâen beni fırın-ı mezkûr ticâretinde kendine şerîk etmesi’çün mezbûr es-Seyyid Mehmed Eşref Usta’ya cebr olunmak murâdımdır deyu takrîr-i meşrûhu üzere tasaddî eylediği da‘vâsından mücerred seni şerîk ederim demesi mukāvele-i meşrû‘adan olmayıp va‘d ve te’siyet kabîlinden olmağla ber-muktezâ-yı şerî‘at-i garrâ iltifâta şâyân olmadığından gayrı bu makūle ? şurût-ı nizâmları dahi olmadığını esnâf-ı hâzirûn-ı merkūmûn ihbâr etmeleriyle bu sûretde îrâd eylediği kelâmı şer‘an ve kānûnen mesmû‘a olmadığı müdde‘î-i mezbûr el-Hâc Halil Ağa’ya tefhîm ve da‘vâ-yı mezkûresiyle merkūm es-Seyyid Mehmed Eşref Usta’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 29 L sene [1]241