İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 49 Hüküm no: 17 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzaz esnafından Mühtedî Mehmed’in, söz konusu esnafın bünyesinden ihrac edildiği Kazzâz esnâfından mühtedî Mehmed’i ihrâc Ma‘rûz Âsitâne-i aliyyede vâkı‘ kazzâz esnâfı kethüdâsı Abdüllatif Ağa ve yiğitbaşısı Mehmed Ağa ve yağcı esnâfı kethüdâsı Ali Ağa ve yiğitbaşısı diğer Mehmed Ağa ve sîmkeş esnâfı kethüdâsı diğer Ali Ağa ve yiğitbaşısı âhar Mehmed Ağa ve esnâf-ı selâse-i mezkûre ehl-i İslâm ustalarından el-Hâc İbrahim Ağa ve el-Hâc Halil Ağa ve Nuri Ağa ve Osman Ağa ve Mehmed Ali Ağa ve diğer el-Hâc İbrahim Ağa ve es-Seyyid Mehmed Emin Ağa ve es-Seyyid Süleyman Ağa ve Mehmed Ağa ve es-Seyyid Hasan Ağa ve es-Seyyid Ali Ağa ve diğer Mehmed Ağa ve Ali Molla ve es-Seyyid İsmail Ağa ve Mehmed Emin Ağa ve sâirleri ile re‘âyâ ustalarından Foti ve Yuvan ve Anesti ve Karabet ve Mikail ve Agop ve ve Serovpe ve Artin ve Yakop ve Havik ve Bogos ve Tavit ve Kegork ve Ohan ve Avadis ve Kirkor ve Bedros ve Haçador ve Manok ve Sahak ve Vartan ve Kazer ve Ağya ve Manas ve Kemal ve Melkon ve sâirleri ile Yehûd ustalarından Menahem ve Celbon ve İsak ve Yasef ve Avram ve Sebetay ve Nesim ve Hayim ve Naftali ve Menteş ve Aron ve Yako ve Davit ve Mirkado ve Kanorta ve Yaşuva ve İlya ve Natan ve Royan ve Mordehay ve Şamanto ve Mayer ve sâir esnâf-ı selâse-i mezkûrenin Müslim ve Rum ve Ermeni ve Yehûd ustaları bâ-cem‘ihim meclis-i şer‘-i münîrde yağcı esnâfından Mühtedî Mehmed b. Abdullah muvâcehesinde mezbûr Mehmed ırz ve edeble mevsûf ve kâr ve kesbiyle me’lûf olmayıp şerîr ve gaddâr ve müzevvir ve bî-âr olduğundan her bâr gerek esnâfımıza ve gerek sâir ibâdullâha envâ‘-i gadri mûcib hâlât-ı nâ-merzıyyeye ibtidâr ve ahâlî-i çarşının ekserinden birer dekk ve desîse ile emvâl ve eşyâ dolandırıp elân zimmetinde vâfir kesânın bâ-defter külliyetli hakk-ı sarîhleri ma‘lûm ve âşikâr iken ba‘zısını inkâr ve ba‘zısını dahi gûnâ-gûn hîle ve tezvîr ile ibtâl-i hakkı irtikâb ve ihtiyâr ve her birimizi birer gûne mutazarrır ve rahnedâr etmekde olduğundan başka esnâfımızdan nice bî-cürm ehl-i ırz kimesnelere türlü ifk ve iftirâ ile îkā‘-ı zulm ve hasâr ve re‘âyâ ve Yehûd tâifesinden hakkını taleb edenlere darb ve şetme ictisâr etmekle hezâr kendüye tenbîh ve nasîhat olunmuş ise de aslen fâriğ ve mütenassıh olmayıp dahi ziyâde nefsâniyet ederek ızrârında ısrâr üzere olmağla ol-vechile mezbûr Mehmed’den kat‘an emn ve râhatımız ve rahne ve te‘addîsine tahammülümüz kalmamışdır deyu bi’l-müvâcehe sû’-i hâlini inhâ ile iştikâ ve ve fî-mâ ba‘d âhar san‘at ile meşgūl olup çarşıya ayak basmamak üzere içlerinden ihrâc ve esnâf-ı merkūmeden tard ve ib‘âd olunmasını istirhâm ve istid‘â eyledikleri İstanbul Mahkemesi’nden huzûr. Fî 23 L sene [1]241