İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 61 Hüküm no: 25 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in evinin yarısını şartlı olarak Şerife Zeliha bt. es-Seyyid Mehmed ile kocası Çalık Mehmed Beşe’ye devretmesinin geçerli olmadığı Şartla olan ferâğın adem-i sıhhatine binâen geri nısf menzil reddi Ma‘rûz Sâhibe-i arzuhâl zâtı mu‘arrefe Fâtıma bt. Mehmed Hatun meclis-i şer‘-i münîrde derûn-ı arzuhâlde mezkûretü’l-ism kezâlik zâtı mu‘arrefe Şerife Zeliha bt. es-Seyyid Mehmed nâm Hatun muvâcehesinde nezâret-i dâ‘îlerinde olan evkāfdan merhûm Fazıl Süleyman Efendi vakfının mütevelliyesi Nâile Hanım tarafından mürsel vekîli câbî-i vakf Mehmed Şâkir Efendi hâzır olduğu hâlde hâmiş-i arzuhâlde mastûr defter-i vakfdan muhrec derkenâr nâtık olduğu üzre vakf-ı mezkûr müstağıllâtından İstanbul’da Edirnekapısı dâhilinde Neslişâh Sultân mahallesinde vâkı‘ bir tarafdan Hüseyin Ağa menzili ve bir tarafdan Yahya Usta menzili ve bir tarafdan Nalbantçı Mehmed menzili ve taraf-ı râbi‘-i tarîk-i âm ile mahdûd ve şehriye otuz akçe icâre-i müecceleli müştemilât-ı ma‘lûmeyi hâvî bir bâb menzil bâ-temessük-i mütevellî bi’l-icâreteyn müstakılleten taht-ı tasarrufumda iken ben bundan akdem menzil-i mezkûru ölünce beni beslemek şartıyla mezbûre Şerife Zeliha Hatun ile zevci gāib ani’l-beled Çalık Mehmed Beşe’ye nısfiyyet üzere bâ-re’y-i mütevellî bilâ-bedel ferâğ ve tefvîz eylediğimde onlar dahi şart-ı mezkûr ile tefevvüz ve kabûl etmişler idi. el-Hâletü hâzihî şart-ı mezkûr ile ferâğ sahîh ve mu‘teber olmamağla menzil-i mezkûru bana red ve teslîme merkūme Şerife Zeliha Hatun’a tenbîh olunmak matlûbumdur deyu da‘vâ ettikde ol-dahi cevâbında kaziyye minvâl-i muharrer üzere olup müdde‘iye-i mezbûre Fâtıma Hatun menzil-i mezkûru ol-şartla fâriğa olduğunu onlar dahi ol-şartla tefevvüz eylediklerini bi-tamâmihâ tâyi‘aten ve kat‘iyyen ikrâr ve i‘tirâf etmekle bu sûretde ber-muktezâ-yı şerî‘at-ı garrâ şart-ı mezkûr ile olan ferâğ-ı mezbûr fâsid olup lâkin mezbûre Şerife Zeliha Hatun’un ikrârı zevci gāib-i mezbûr üzerine nâfiz olmayıp yalnız kendi hakkında mu‘teber olmağın mûcebince gāib-i mezbûr Çalık Mehmed Beşe üzerinde olan nısf hisse husûsu gāib-i mezbûr ile bi’l-müvâcehe terâfü‘-i şer‘-i şerîf olunmak üzere ancak mezbûre Şerife Zeliha Hatun’un üzerinde olan nısf hisseyi bâ-re’y-i mütevellî mutasarrıfesi müdde‘iye-i mezbûre Fâtıma Hatun’a red ve teslîm iktizâ eylediği tarafeyne tefhîm olunduğu İstanbul Mahkemesi’nden huzûr. Fî 27 L sene [1]241