İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 64 Hüküm no: 27 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Leblebicioğlu Hüseyin Beşe b. Abdüllatif’in, kiracısı Yanto v. Avram’dan alacağını taleb ettiği 3925 guruş men‘i Ma‘rûz Mahrûse-i Galata’ya muzâfe Ördek kasabası [kasab mahallesi] ahâlîsinden sâhib-i arzuhâl Leblebicioğlu Hüseyin Beşe b. Abdüllatîf nâm kimesne meclis-i şer‘-i münîrde İstanbul’da Balat nâm mahalde mütemekkin şerbetçi tâifesinden Yanto v. Avram nâm yahudi muvâcehesinde Yahudi-i mersûmun şerîki Mayer v. Yasef nâm yahudi hâzır olduğu hâlde bin iki yüz otuz altı senesi Muharremi’nde mesfûr Yanto yahudi zikr olunan Ördek kasabasına gelip yedimden ve malımdan iştirâ ve kabz eylediği seksen bin yüz seksen sekiz vukıyye üzümün beher yüz vukıyyesi on ikişer guruşdan esmânı olan cem‘an dokuz bin yedi yüz otuz guruş ve kezâlik yedimden ve malımdan bi-safka-i vâhide iştirâ ve kabz eylediği yüz elli yük hatabın semeni olan iki yüz beş guruş ve kasaba-i mezbûrede vâkı‘ mülküm olup mersûm Yanto yahudinin benden istîcâr ve müddet-i ma‘lûme mürûrunda temekkün ve istîfâ-yı menfa‘at eylediği bir kıt‘a mağazanın ecr-i müsemmâsı olan yedi yüz yirmi guruşu ki ciheteyn-i mezkûreteynden cem‘an mesfûr Yanto yahudi zimmetinde alacak hakkım olan on bin altı yüz elli beş guruşun yüz elli beş guruşunu rızâmla hat ve tenzîl ve mutâlebesine müte‘allika da‘vâdan yahudi mersûmun zimmetini ibrâ ve ıskāt eylediğimde ol-dahi kabûl ve bâkīsi olan on bin beş yüz guruşun dört bin yetmiş beş guruşunu kasaba-i mezbûrede ve iki bin beş yüz guruşunu dahi ba‘de’l-avde Âsitâne-i aliyyede bana edâ ve ol-vechile cem‘an altı bin beş yüz yetmiş beş guruşunu teslîm ve îfâ edip bâkī üç bin dokuz yüz yirmi beş guruşu el-yevm zimmetinde kalmağla meblağ-ı bâkī-i mezkûr üç bin dokuz yüz yirmi beş guruşu mersûm Yanto yahudiden hâlâ taleb ederim deyu da‘vâ ettikde ol-dahi cevâbında ben şerîkim hâzır-ı mersûm Mayer yahudinin babası olup bundan akdem hâlik olan mersûm Yasef yahudinin sağlığında hizmetkârı olmamla târih-i mezkûrda mesfûr Yasef yahudi ile ma‘an hizmetkâr olduğum hâlde kasaba-i mezbûreye gidip merkūm [11b] Hüseyin Beşe’nin benden iddi‘â eylediği üzüm ve hatabı hâlik-i mersûm Yasef yahudi iştirâ ve mahzen-i mezkûru istîcâr ve semen ve ücretlerini tamâmen edâ ve îfâ edip birbirleriyle kat‘-ı alâka dahi etmişler idi deyu kendinin iştirâ ve istîcârını külliyen inkâr etmekle müdde‘î-i mezbûr Hüseyin Beşe ber-vech-i muharrer müdde‘âsına lede’l-istimhâl ve’l-imhâl müddet-i mehil-i şer‘î kirâren ve mirâren mürûr edip bir vechile isbâta kādir olamayıp istihlâf ettikde mersûm Yanto yahudiye bi’l-müvâcehe vech-i şer‘î üzere yemîn verilmeğin mûcebince müdde‘î-i mezbûr Hüseyin Beşe da‘vâ-yı mezkûresiyle mersûm Yanto yahudiye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 21 L sene [1]241