İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 65 Hüküm no: 28 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Altıparmak Kosti’nin, Mercan Hanı’ndaki dükkândaki hakkını, Acî Nişan’a devrettiği halde dükkânı boşaltmadığı Mercan Hânı’nda oda ferâğı Ma‘rûz Âsitâne-i aliyyede vâkı‘ çizmeci esnâfından sâhib-i arzuhâl Acî Nişan v. Kegork zimmî bi’l-ma‘iyye istimâ‘a memûr Haremeyn-i şerîfeyn müfettişi umdetü’l-mevâlîyyi’l-izâm Emin Beyefendizâde fazîletlü Abdülkādir Beyefendi taraflarından meb‘ûs Kâtib Mehmed Nizâmeddin Efendi dâ‘îleriyle akd olunan meclis-i şer‘-i münîrde İstanbul’da Kumkapı kurbünde mütemekkin derûn-ı arzuhâlde ismi mastûr Kuyumcu Altıparmak Kosti v. Atam zimmî muvâcehesinde Dârussa‘âdetü’ş-Şerîfe Ağası hazretleri nezâret-i aliyyelerinde âsûde evkāfdan merhûm Mercan Ağa vakfının kāimmakām-ı mütevellîsi el-Hâc İbrahim Edhem Dede hâzır olduğu hâlde İstanbul’da Çarşı-yı Kebîr’de kâin vakf-ı mezkûr müstağallâtından Mercan Hanı demekle meşhûr kârgîr hân derûnunda çizmeci ve kuyumcu odaları beynlerinde vâkı‘ beher şehr yirmi akçe icâre-i müecceleli bir bâb oda bâ-temessük-i mütevellî bi’l-icâreteyn mersûm Kosti zimmînin taht-ı tasarrufunda iken zimmî-i mersûm işbu târihden iki ay mukaddem zikr olunan odayı iki bin yüz guruş bedel-i makbûz mukābelesinde? bâ-re’y-i mütevellî kat‘iyyen bana fâriğ olmuş-iken hâlâ keff-i yed etmemekle suâl olunup kasr-ı yedine tenbîh olunmak matlûbumdur deyu da‘vâ eylediğimde ol-dahi cevâbında ben oda-i mezkûreyi ber-vech-i muharrer sana ferâğ eder olduğumda derûnuna gedik i‘tibâriyle şehriye on ikişer guruşa bana îcâr ve ol-vechile oda-i mezkûrede ben temekkün etmek şartıyla ferâğ ve tefvîz sen-dahi ol-şartla tefevvüz ve kabûl etmekle bu sûretde şart-ı mezkûr ile olan ferâğım sahîh olmadığından medfû‘un olan bedel-i mezkûru yedimden geri ahz edip oda-i mezkûreyi bana red ve ferâğa sana tenbîh olunmak matlûbumdur deyu inkârıma mukārin eylediği şart-ı müfsid müdde‘âsı beyâna havâle olunmuş-idi. el-Hâletü hâzihî muslihûn tavassutuyla beynimiz te’lîf olunup ben oda-i mezkûreyi hüsn-i rızâ ve tayyib-i hâtırım ve ferâğ-ı mu‘teber-i kat‘î ile yine iki bin yüz guruş bedel mukābelesinde mersûm Kosti zimmîye bâ-re’y-i mütevellî ferâğ ve tefvîz ve teslîm eylediğimde ol-dahi ber-vech-i muharrer tefevvüz ve tesellüm ve kabûl ve bedel-i mezkûr iki bin yüz guruş ile husûs-ı mezkûr zımnında masrûfum olan yüz elli guruş ki cem‘an iki bin iki yüz elli guruşu tamâmen ve kâmilen bana def‘ ve teslîm ve umûruma sarfla istihlâke emr etmekle ben-dahi ahz ve kabz ve emri üzere umûruma sarfla istihlâk edip bi’l-cümle husûs-ı mezkûra ve ferâğ-ı mezbûrda şurût-ı müfside müdde‘âsına ve meblağ-ı müstehlek-i mezkûrun istirdâdına müte‘allıka âmme-i da‘vâdan tarafeynden her birimiz âharın zimmetini ibrâ-i âmm-i sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl etmemizle fî-mâ ba‘d oda-i mezkûre kemâ-fi’s-sâbık mersûm Kosti zimmînin re’y-i mütevellî ile dâhil-i havza-i tasarrufu ve hakk-ı müfevvezi olup benim aslen ve kat‘an alâka ve medhalim kalmamışdır deyu mukırr-ı mersûm Acî Nişan zimmînin bi’l-cümle takrîr-i meşrûhunu mersûm Kosti zimmî tasdîk ve oda-i mezkûreyi mesfûr Acî Nişan zimmînin ber-vech-i muharrer ferâğ ve kasr-ı yedinden mütefevviz-i mersûm Kosti zimmînin tasarrufunu kāimmakām-ı mütevellî-i hâzır-ı merkūm el-Hâc İbrahim Edhem Dede bi’t-tevliye re’y edip bu vechile külliyen kat‘-ı nizâ‘ eyledikleri İstanbul Mahkemesi’nden huzûr. Fî Gurre-i Za sene [1]241