İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 66 Hüküm no: 29 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep tüccarından Harîrîzâde el-Hâc Mehmed Ağa b. el-Hâc Taha’nın, İstanbul tüccarından Fesçi Ebu İshak Mehmed Ağa b. Mehmed’den aldığı feslerin bedelini talep ettiği Fes semeninden 4500 guruş men‘ Ma‘rûz Haleb tüccârından sâhib-i arzuhâl Harîrîzâde el-Hâc Mehmed Ağa b. el-Hâc Taha meclis-i şer‘-i münîrde Âsitâne-i aliyyede vâkı‘ fesci esnâfından derûn-ı arzuhâlde mezkûrü’l-ism Ebû İshak Mehmed Ağa b. Mehmed muvâcehesinde mezbûr Ebû İshak Mehmed Ağa zimmetinde bundan akdem yedimden ve malımdan iştirâ ve kabz eylediği mikdâr ve fiy’âtı beynimizde ma‘lûm envâ‘-ı fes ve Mağrib şâlı ve sâir bu makūle fesci metâ‘ı semeninden alacak hakkım olan otuz bir bin guruşdan merkūm Mehmed Ağa ile bi’t-tav‘ ve’r-rızâ on beş bin guruş üzerine sulh olduğumda ol-dahi sulh-i mezkûru kabûl eyledikden sonra bedel-i sulh-ı mezkûr on beş bin guruşun dört bin doksan dokuz guruşunu işbu yedimde olup, târih-i i‘lâm şehri Şevvalü’l-mükerreminin dokuzuncu günü târihiyle müverrah İstanbul Mahkemesi’nden verilen bir kıt‘a i‘lâm-ı şer‘îde tasrîh ve beyân kılındığı üzere Fesci Süleyman Ağa b. Kasım nâm kimesneden şerâit-i şer‘iyyesi üzere havâleten ve dört yüz bir guruşunu dahi nakden edâ ve altı bin guruşuna dahi beher destesi altmış guruş kıymetli yüz deste fes ve dört bin beş yüz guruşuna dahi beher destesi otuzar guruş kıymetli yüz elli deste fes verip ol-vechile bedel-i sulh-ı merkūm on beş bin guruşu bu vechile bi’t-tamâm teslîm ve îfâ etmiş-idi. Lâkin sâlifü’z-zikr destesi otuzar guruş kıymet takdîr olunan yüz elli deste fesi dükkânıma götürüp destelerini küşâd eylediğimde gösterdiği nümûne gibi çıkmayıp kıymeti dûn ve alçak cinsinden olmağla zikr olunan yüz elli deste fesi geri alıp kıymet takdîr olunan dört bin beş yüz guruşu bana vermeğe merkūm Mehmed Ağa’ya tenbîh olunmak matlûbumdur deyu da‘vâ ettikde ol-dahi cevâbında ben zikr olunan fesleri vech-i meşrûh üzere bedel-i sulh-i mezkûrun ol-mikdârına mahsûben müdde‘î-i mezbûr el-Hâc Mehmed Ağa’ya teslîm eder iken ber-vech-i dikkat gereği gibi mu‘âyene ve ta‘dâd ederek beğenip rızâsıyla ahz ve kabûl eylediğinden başka yedimde olup işbu bin iki yüz kırk bir senesi Cumâdelûlâsı’nın yirmi birinci günü târihiyle müverrah ve tarafeynin imzâ ve hatmini hâvî bir kıt‘a Arabiyyü’l-ibâre kat‘-ı alâka senedinde zikr ve beyân olunduğu üzere beynimizde cereyân eden işbu ahz ve i‘tâdan sâlifü’z-zikr nakden ve havâleten edâ eylediğim dört bin beş yüz guruşdan mâ‘adâ bedel-i sulh-i mezkûru tamâmen ahz ve istîfâ eyledim ba‘de’l-yevm meblağ-ı mezkûr dört bin beş yüz guruşdan gayrı yed ve zimmetinde hakkım yokdur deyu huzûr-ı müslimînde ikrâr ve i‘tirâf ve ba‘dehû istisnâ kılınan meblağ-ı mezkûr dört bin beş yüz guruşu dahi ber-minvâl-i muharrer nakden ve havâleten istîfâ etmekle ol-vechile müdde‘î-i mezbûr el-Hâc Mehmed Ağa’nın benim yed ve zimmet ve kıbelimde bir akçe bâkī hakkı kalmamışdır deyu eylediği def‘ini ve sened-i mezkûrun mazmûnunu ve ber-vech-i muharrer bedel-i sulh merkūm on beş bin guruşu tamâmen ahz ve istîfâ edip fî-mâ-ba‘d merkūm Ebû İshak Mehmed Ağa’nın yed ve zimmet ve kıbelinde kat‘an hakkım yokdur deyu ikrârını bi-tamâmihî tâyi‘an ve kat‘iyyen ikrâr ve i’tirâf etmeğin bu sûretde zikr olunan fesleri ba‘de’r-ru’ye kabûl ve fî-mâ ba‘d kat‘an hakkı kalmadığını ikrâr etmiş-iken ber-muktezâ-yı şerî‘at-ı garrâ tasaddî eylediği da‘vâsı mesmû‘a olmadığı müdde‘î-i mezbûr el-Hâc Mehmed Ağa’ya tefhîm ve da‘vâ-yı mezkûresiyle merkūm Mehmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 27 L sene [1]241