İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 69 Hüküm no: 31 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci esnafından Agop ile ortağı ve kardeşi Mıgırdiç’in, Emtia Gümrüğü kâtiblerinden Ebûbekir Efendi’den alacağı olduğu Mi‘mar Ağa Konağı’nda huzûrla 490 guruşa sulh Ma‘rûz Âsitâne-i aliyyede vâkı‘ keresteci esnâfından sâhib-i arzuhâl Agop ve şerîki karındaşı Mıgırdıç v. Bogos nâm zimmîler sâdır olan fermân-ı âlîlerine imtisâlen kıbel-i şer‘den me’zûnen mürsel kâtib es-Seyyid Ahmed Efendi dâ‘îlerinin İstanbul’da Laleli Câmi‘-i Şerîfi kurbünde Çukurçeşme nâm mahalde kâin hâlâ mi‘mârân-ı hâssa ağa bendelerinin konağında mazbûtu’l-esâmî müslimîn huzurlarında akd eylediği meclis-i şer‘-i enverde derûn-ı arzuhâlde ismi mezkûr emti‘a gümrüğü ketebelerinden Ebûbekir Efendi b. Mehmed Sâdık muvâcehesinde mezbûr Ebûbekir Efendi zimmetinde bin iki yüz otuz yedi senesi yedimizden ve malımızdan iştirâ ve kabz eylediği bâ-defter-i müfredât ma‘lûmü’l-ecnâs ve’l-fiy’ât kereste semeninden ba‘de külli’l-hesâb gayrı-ez-teslîmât sahhe’l-bâkī alacak hakkımız olan bin iki yüz otuz iki guruşu mezbûr Ebûbekir Efendi’den hâlâ taleb ederiz deyu tasaddî eylediğimiz da‘vâmızdan bâ-tavassut-ı muslihîn mezbûr Ebûbekir Efendi ile bi’t-tav‘ ve’r-rızâ dört yüz doksan guruş üzerine sulh olduğumuzda ol-dahi sulh-i mezkûru kabûl etmekle bedel-i sulh-i mezkûrdan mâ‘adâya ve bi’l-cümle husûs-ı mezkûra müte‘allika âmme-i da‘vâdan mezbûr Ebûbekir Efendi’nin zimmetini kabûlü hâvî ibrâ ve ıskāt eyledik deyu mukırrân-ı mersûmânın bi’l-cümle takrîr-i meşrûhlarını mezbûr Ebûbekir Efendi tasdîk ve ibrâdan müstesnâ bedel-i sulh-i mezkûr dört yüz doksan guruş zimmetinde müdde‘iyân-ı mersûmâna sahîhan deyni olduğunu ikrâr ve i‘tirâf etmeğin alâ-mûcebi ikrârihî bedel-i sulh mezkûr dört yüz doksan guruşun müdde‘iyân-ı mersûmân Agop ve Mıgırdıç zimmîlere edâsıyla mezbûr Ebûbekir Efendi’yi ilzâm eylediğini kâtib-i mezbûr mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği ba‘de’t-tenfîz İstanbul Mahkemesi’nden huzûr. Fî 5 Za sene [1]241