Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 349 Hüküm no: 388 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Receb’in azatlı kölesi Hasan b. Abdullah’a borcunun olmadığı Mahmiye-i İstanbul’da Hoca Halil Attâr mahallesinde sâkin iken bundan akdem vefât eden merhûm el-Hâc Mehmed b. Receb[‘in] abd-i mu‘takı olan Hasan b. Abdullah nâm müteveffânın zevce-i metrûkesi Gülistan bt. Abdullah meclis-i şer‘-i şerîfde merkūm el-Hâc Mehmed’in sulbî oğlu ve hasren vârisi olmağla terekesine vâzı‘ü’l-yed olan Mustafa nâm kimesne mahzarında üzerine da‘vâ ve takrîr-i kelâm edip zevcem müteveffâ-yı merkūm Hasan hayâtında mu‘takı müteveffâ-yı merkūm el-Hâc Mehmed[‘e] yüz esedî guruş ikrâz ve teslîm merkūm el-Hâc Mehmed dahi iktirâz ve kabz ettiğinden sonra kable’l-edâ mezbûrân el-Hâc Mehmed ve Hasan vefât etmeleriyle hâlâ merkūm Mustafa Çelebi’den suâl olunup meblağ-ı mezbûr yüz guruşdan irsen bana isâbet ve intikāl eden yirmi beş guruş rub‘ hissemi babası müteveffâ-yı mezbûr el-Hâc Mehmed’in terekesinden bana edâya tenbîh olunmak matlûbumdur dedikde gıbbe’s-suâl ve akībe’l-inkâr, müdde‘iye-i mezbûre Gülistan’dan müdde‘âsına muvâfık beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka babası müteveffâ-yı mezbûr el-Hâc Mehmed hayâtında müteveffâ-yı merkūm Hasan’dan meblağ-ı mezbûr yüz guruşu ber vech-i muharrer ikrâz ve kabz eylediğini bilmeyip ve ol vecihden üzerinde müdde‘iye-i mezbûrenin hakkı olmadığına mezbûr Mustafa’ya yemîn teklîf olundukda ol dahi vefki’l-mes’ûl yemîn billâhi te‘âlâ etmeğin mûcebince müdde‘iye-i mezbûre bilâ-beyyine mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Recebi’l-ferd li sene seb‘a ve tis‘în ve elf. Şuhûdü’l-hâl: Mustafa Ağa b. Abdurrahman, el-Hâc Mustafa b. Tevekkül, Ahmed Beşe b. Abdurrahman, İbrahim Çelebi b. Ahmed.