Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 350 Hüküm no: 389 Orijinal metin no: [61b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Abdülaziz’in Fâtıma bt. Osman’dan alacağı olduğu Mahmiye-i İstanbul’da Tevkī‘î Cafer Çelebi mahallesinde sâkine İsmihan bt. Abdülaziz nâm hâtun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olan mahalle-i mezbûre sükkânından Osman Beşe b. Ahmed ve Selim b. Ebûbekir nâm kimesneler şehâdetleriyle şer‘an sâbit olan Sâliha bt. Receb nâm hâtun meclis-i şer‘-i şerîfde mahmiye-i mezbûrede Karagümrük kurbunda Hatice Sultan mahallesinde sâkine olup zâtını ma‘rifet-i şer‘iyye ile ârifân olan mezbûrân Osman Beşe ve Selim ta‘rîfleri ile mu‘arrefe olan Fâtıma bt. Osman nâm hâtun mahzarında bi’l-vekâle üzerine da‘vâ ve takrîr-i kelâm edip müvekkilem mezbûre İsmihan Hâtun merkūme Fâtıma Hâtun’a yüz yetmiş esedî guruşa bundan akdem Rûsiyyü’l-asl bir re’s bikr câriye-i memlûkesini bey‘ ve teslîm merkūme Fâtıma Hâtun dahi ber vech-i muharrer üzre [62a] iştirâ ve tesellüm ettikden sonra semeni olan meblağ-ı mezbûr yüz yetmiş guruşun beş guruşunu merkūme Fâtıma Hâtun müvekkilem mezbûre İsmihan Hâtun’a def‘ ve teslîm edip zimmetinde yüz altmış beş guruş hakkı bâkī kalmağın hâlâ merkūme Fâtıma Hâtun’a suâl olunup meblağ-ı mezbûr yüz altmış beş guruşun alıverilmesi matlûbumdur dedikde gıbbe’s-suâl merkūme Fâtıma Hâtun cevâbında fi’l-hakīka kaziyye minvâl-i muharrer üzre olup müvekkile-i merkūme İsmihan’a yüz altmış beş guruş vâcibü’l-edâ ve lâzımü’l-kazâ deyni olduğunu tâyi‘an ikrâr ve i‘tirâf etmeğin alâ mûcebi i‘tirâfihî meblağ-ı bâkī-i mezbûr yüz altmış beş guruşunu müvekkile-i merkūme İsmihan Hâtun’a edâ ve teslîm mezbûre Fâtıma Hâtun’a tenbîh olunup mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Çavuş b. Ali el-Mübâşir, Mehmed b. [İ]dris Çavuş, Hüseyin b. Mustafa, el-Hâc Mustafa b. Tevekkül, Ebûbekir b. Hüseyin.