İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 75 Hüküm no: 37 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Kaptan b. Hasan’ın, Süleyman b. Mehmed’e bedelsiz olarak verdiği cariyeyi, Süleyman b. Mehmed’in sattığını iddia ettiği 7250 guruş câriye kıymeti men‘i Ma‘rûz Anadolu’da Trabzon sancağında Hopa kazâsı ahâlîsinden ve ruesâ-yı sefâyinden derûn-ı arzuhâlde mastûru’l-ism el-Hâc Mehmed Kapudan b. Hasan Çarşamba günü arz odasında huzûr-ı hazret-i sadâret-penâhîlerinde ma‘kūd meclis-i şer‘-i enverde üserâ celebânından sâhib-i arzuhâl Acaralı Süleyman b. Mehmed muvâcehesinde târih-i i‘lâmdan dokuz sene mukaddem rıkka münkāde yedimde mülküm olan orta boylu kara kaşlı kara gözlü gür saçlı Abaza cinsinden tahmînen yirmi yaşında bir re’s câriyemi zikr olunan Hopa kazâsında li-ecli’l-istihdâm merkūm Süleyman’a i‘âre ve teslîm eylediğimde ol-dahi isti‘âre ve kabz lâkin câriye-i mezbûreyi izinsiz fuzûlen Mısr-ı Kahire’ye getürüp yedi bin iki yüz elli guruşa âhara bey‘ ve teslîmle istihlâk etmekle câriye-i mezbûrenin kıymet-i şer‘iyesi olan yedi bin iki yüz elli guruşu merkūm Süleyman’dan zamânen hâlâ taleb ederim deyu ba‘de’d-da‘vâ ve’l-inkâr müdde‘î-i merkūm el-Hâc Mehmed Kapudan ber-vech-i muharrer müdde‘âsına ikāmet-i beyyine edemeyip bi’t-taleb merkūm Süleyman bi’l-müvâcehe ber-nehc-i şer‘î tahlîf olunmağın mûcebince müdde‘î-i merkūm el-Hâc Mehmed Kapudan da‘vâ-yı mezkûresiyle mezbûr Süleyman’a bilâ-beyyine mu‘ârazadan men‘ olunduğu huzûr. Fî 8 Za sene [1]241