İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 81 Hüküm no: 44 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasaplar Kethüdâsı el-Hâc Hasan Ağa b. el-Hâc Osman’ın, kasap dükkânlarındaki hisselerini Yani v. Tanaş’a devrettiği Kasab ferâğı Ma‘rûz Hudavendigâr-ı esbak cennet-mekân firdevs-âşiyân Sultân Abdülhamîd Hân tâbe serâhû hazretleri evkāf-ı şerîfelerinden Yedikule hâricinde vâkı‘ gayrı-ez-selhhâne-i mîrî on aded ganem selhhânelerinden beşinci selhhâneye merbût Kuruçeşme karyesinde bir bâb kasab dükkânı derûnunda mevcûde gedik ta‘bîr olunan âlât-ı lâzıme-i ma‘lûmenin sümün hissesine ve dördüncü selhhâneye merbût Bebek karyesinde bir ve Rumeli hisârı karyesinde iki bâb ve Arnavud karyesinde bir bâb ki cem‘an dört bâb kasab dükkânları derûnlarında mevcûde gedik ta‘bîr olunan âlât-ı lâzıme-i ma‘lûmelerin her birinden südüs hisselerine bâ-temessük-i mütevellî mutasarrıf olan kassabân kethüdâsı el-Hâc Hasan Ağa b. el-Hâc Osman meclis-i şer‘-i münîrde Yani v. Tanaş zimmî muvâcehesinde ber-vech-i muharrer mutasarrıf olduğum hisse-i mezkûreleri hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûm Yani zimmîye ferâğ ve tefvîz ve vech-i lâyıkları üzere teslîm eylediğimde ol-dahi ber-vech-i muharrer tefevvüz ve kabûl etmekle ba‘de’l-yevm hisas-ı mezkûrede benim alâkam kalmayıp mersûm Yani zimmînin dâhil-i havza-i tasarrufu olmuşdur deyu takrîrini zimmî-i mersûm tasdîk etmeğin bu sûretle hisas-ı mezkûre defter-i vakf-ı şerîfde mersûm Yani zimmî uhdesine kayd ile merkūm el-Hâc Hasan Ağa’nın yedinde olan temessükden ifrâz ve keyfiyyet hâmişine şerh ve imlâ ve hisas-ı mezkûreyi mersûmun zabtı’çün taraf-ı vakf-ı şerîfden yedine müceddeden bir kıt‘a temessük i‘tâ buyurulması iktizâ eylediği İstanbul Mahkemesi’nden huzûr. Fî Gurre-i Z[ilkâ‘de] sene [1]241