Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 350 Hüküm no: 390 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Deli Ahmed b. Mustafa’nın İbrahim b. Abd’daki alacağının vârisi tarafından tahsil edildiği Vilâyet-i Anadolu’da Tosya kasabası mahallâtından Yeni mahalle ahâlîsinden olup bundan akdem Beç seferi avdetinde medîne-i Belgrad’da vefât eden Deli Ahmed b. Mustafa’nın li ebeveyn karındaşı ve hasren vârisi olduğu şer‘an sâbit olan Mustafa nâm kimesne meclis-i şer‘-i şerîfde mahmiye-i İstanbul’da Mi‘mâr Sinan mahallesinde sâkin bâ‘isü hâze’l-kitâb İbrahim b. Abd[ullah] nâm kimesne mahzarında ikrâr ve takrîr-i kelâm edip karındaşı müteveffâ-yı mezbûr Ahmed hayâtında yirmi guruşu mezbûr İbrahim’e edâ ve teslîm ol dahi ber vech-i muharrer istidâne ve kabz ettiğinden sonra meblağ-ı mezbûru kable’l-ahz vefât etmekle meblağ-ı mezbûru, mezbûr İbrahim’den taleb ve da‘vâ eylediğimde ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremden altı guruş üzerine mezbûr İbrahim benimle müsâlaha olup ben dahi sulh-i mezbûru kabûl ve bedel-i sulh olan meblağ-ı mezbûr altı guruşu yedinden tamâmen ahz u kabz eylediğimden sonra bâkī on dört guruşa müte‘allika âmme-i da‘vâdan mezbûr İbrahim’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ömer Çelebi b. Osman, Receb Beşe b. Mustafa, Seydî Beşe b. Himmet, Kara Mehmed Beşe b. Himmet, Solak Mehmed Çelebi b. Abdi ve gayruhüm.