İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 87 Hüküm no: 48 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Abdullah’ın evini Kuruyemişçi Ahmed Ağa’ya devrederken aklının yerinde olmadığını iddia ettiği Menzil reddi Ma‘rûz Âsitâne-i aliyyede vâkı‘ kutucu esnâfından es-Seyyid Abdullah nâm kimesne meclis-i şer‘-i münîrde zikri [zikr-i] âtî menzile vaz‘-ı yedi mütehakkik olan derûn-ı arzuhâlde mezkûrü’l-ism kuruyemişçi Ahmed Ağa b. Bayram kimesne muvâcehesinde nezâret-i dâ‘îlerinde olan evkāfdan merhûm Çivizâde Kara Balı Şeyh Mehmed Efendi vakfının kāimmakām-ı mütevellîsi Süleyman Ağa hâzır olduğu hâlde hâmiş-i arzuhâlde mastûr defter-i vakfdan muhrec derkenâr nâtık olduğu üzere vakf-ı mezkûr müsakkafâtından mahmiye-i İstanbul’da Zeyrek kurbünde Hızır Bey Mahallesi’nde vâkı‘ bir tarafı el-Hâc Yusuf Ağa menzili ve bir tarafı Velî Ağa menzili ve bir tarafı Ali Reis menzili ve taraf-ı râbi‘i tarîk-i âm ile mahdûd beher şehr on akçe icâre-i müeccelelü bir bâb menzile bâ-temessük-i mütevellî bi’l-icâreteyn mutasarrıf olan babam Kutucu Salih Efendi b. Veyis bundan akdem vefât edip menzil-i mezkûr intikāl-i âdî ile bana intikāl ettikden sonra ben bin iki yüz otuz beş senesi Şevvali’nin dokuzuncu günü menzil-i mezkûru hüsn-i rızâ ve tayyib-i hâtırım ve ferâğ-ı mu‘teber-i kat‘î ile bin yüz elli guruş bedel-i makbûz ve müstehlek mukābelesinde bâ-re’y-i mütevellî merkūm Ahmed Ağa’ya -ferâğ ve tefvîz ve teslîm ol-dahi tefevvüz ve kabûl etmişdi lâkin ben hîn-i ferâğımda tâmmü’l-akl olmayıp mecnûn bulunmamla ol-vechile ferâğım sahîh olmadığından menzil-i mezkûru re’y-i mütevellî ile bana red ve teslîme merkūm Ahmed Ağa’ya (sah sah sah)- tenbîh olunmak matlûbumdur deyu da‘vâ ol-dahi cevâbında müdde‘î-i mezbûr hîn-i ferâğında tâmmü’l-akl ve reşîd ve cemî‘-i tasarrufâtı sahîh ve nâfiz olur hâl-i sıhhatinde idi deyu da‘vâ etmeleriyle bu sûretde ber-muktezâ-yı şerî‘at-i garrâ husûs-ı mezbûrda sıhhat beyyinesi evlâ olduğundan merkūm Ahmed Ağa beyâna havâle olundukda ol-dahi ber-vech-i muharrer sıhhat müdde‘âsını lede’t-tezkiye adl ve makbûlü’ş-şehâde idükleri ihbâr olunan peynirci Bayram oğlu Mehmed Emîn Ağa b. el-Hâc Mustafa ve es-Seyyid Mehmed Yazıcı b. es-Seyyid Ebî Bekir nâm kimesneler şehâdetleriyle bi’l-müvâcehe vech-i vecîh-i şer‘î üzere isbât etmeğin mûcebince müdde‘î-i mezbûr es-Seyyid Abdullah da‘vâ-yı mezkûresiyle merkūm Ahmed Ağa’ya bî-vech-i şer‘î mu‘ârazadan men‘ olunmağla menzil-i mezkûr kemâ-kân re’y-i mütevellî ile mutasarrıfı merkūm Ahmed Ağa’nın zabt ve tasarrufu iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 7 Za sene [1]241