İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 88 Hüküm no: 49 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzaz esnafından Mühtedî Mehmed’in; Kazzaz, Yağcı ve Simkeş esnafı kethüda ve ustalarının kendisini çarşıdan ihrac ettiklerini şikâyet ettiği Kazzâz Esnâfından Mühtedî Mehmed’i Tard ve İhrâc Mübârek rikâb-ı kamer-tâb-ı hazret-i zıllullâhîye takdîm-i arzuhâl eden Mühtedî Mehmed b. Abdullah Çarşama günü huzûr-ı bâhirü’n-nûr-i vekâlet-penâhîlerinde ma‘kūd meclis-i şer‘-i münîrde Âsitâne-i aliyyede vâkı‘ kazzâzân esnâfı kethüdâsı Abdüllatîf Ağa ve Yiğitbaşısı Mehmed Ağa ve yağcı esnâfı kethüdâsı Ali Ağa ve Yiğitbaşısı diğer Mehmed Ağa ve sîmkeş esnâfı kethüdâsı diğer Ali Ağa ve Yiğitbaşısı âhar Mehmed Ağa ve esnâf-ı selâse-i mezkûrenin ehl-i İslâm ustalarından es-Seyyid Mehmed Emin Ağa ve es-Seyyid Süleyman Ağa ve es-Seyyid Hasan Ağa ve es-Seyyid Ali Ağa ve es-Seyyid İsmail Ağa ve el-Hâc İbrahim Ağa ve el-Hâc Halil Ağa ve diğer el-Hâc İbrahim Ağa ve Nuri Ağa ve Osman Ağa ve Mehmed Ali Ağa ve Mehmed Ağa ve Ali Molla ve Mehmed Emin Ağa ve diğer Mehmed ve sâirleri ile re‘âyâ ustalarından Foti ve Yuvan ve Anesti ve Karabet ve Mikayil ve Agop ve Kerope ve Artin ve Yakop ve Havik ve Bogos ve Tavit ve Kegork ve Ohannes ve Avadis ve Kirkor ve Bedros ve Haçador ve Manok ve Sahak ve Vartan ve Kazer ve Ağya ve Manas ve Melkon ve sâirleri ve Yehûd ustalarından Menahem ve Celbon ve İsak ve Yasef ve Avram ve Sebetay ve Nesim ve Hayim ve Naftali ve Menteş ve Kemal ve Aron ve Yako ve Davit ve Mirkado ve Kanorta ve Yaşuva ve İlya ve Natan ve Royan ve Mordehay ve Şamanto ve Mayer ve Kalef ve Yuda ve Salamon ve sâir esnâf-ı selâse-i mezkûrenin Müslim ve Rum ve Ermeni ve Yehûd ustaları muvâcehelerinde ben kazzâz tâifesinden olup kılıç ve piştov kaytanı i‘mâliyle meşgūl iken merkūmûn beni çarşıdan tard etmeleriyle suâl olunup kemâ-fi’s-sâbık çarşıda iskânıma esnâf-ı selâse-i mezkûreye tenbîh olunmak murâdımdır dedikde onlar dahi cevâblarında işbu yedimizde olup huzûr-ı hazret-i sadâret-penâhîde bi’l-müvâcehe kırâat olunan i‘lâm-ı şer‘île tasrîh olunduğu üzere merkūm Mehmed ırz ve edeble mevsûf ve kâr ve kesbiyle me’lûf olmayıp şerîr ve gaddâr ve müzevvir ve bî-âr olduğundan her bâr gerek esnâfımızda ve gerek sâir ibâdullâha envâ‘-ı gadri mûceb hâlât-ı nâ-marziyyeye ibtidâr ve ahâlî-i çarşının ekserinden bir dekk ve desîse ile emvâl ve eşyâ dolandırıp elân zimmetinde vâfir kesânın bâ-defter külliyetlü hakk-ı sarîhleri ma‘lûm ve âşikâr iken ba‘zısını inkâr ve ba‘zısını dahi gûnâ-gûn hîle ve tezvîr ile ibtâl-i hakkı irtikâb ve ihtiyâr ve her birimizi bir gûne mutazarrır ve rahne-dâr etmekde olduğundan başka esnâfımızdan nice bî-cürm ehl-i ırz kimesnelere türlü türlü ifk ve iftirâ ile îkā‘-yı zulm ve hasâr ve re‘âyâ ve Yehûd tâifesinden hakkını taleb edenleri darb ve şetme ictisâr etmekle hezâr kendüye tenbîh ve nasîhat olunmuş ise de aslâ fâriğ ve mütenassıh olmayıp dahi ziyâde nefsâniyet ederek ızrârında ısrâr üzere olduğundan şehr-i sâbık Şevvalü’l-mükerremin yirmi üçüncü günü merkūm Mehmed’i İstanbul Mahkemesi’nden huzûr-ı şer‘-i şerîfe ihzâr ile kat‘â emn ve râhatımız ve rahne ve te‘addîsine tahammülümüz kalmamışdır deyu cümlemiz muvâcehesinde sû-i hâlini inhâ ve iştikâ ve fî-mâ-ba‘d âhar san‘at ile meşgūl olup çarşıya ayak basmamak üzere içimizden ihrâc ve esnâfımızdan tard ve ib‘âd olunmasını istirhâm ve istid‘â etmemizle taraf-ı şer‘-i şerîfden huzûr-ı âlîye i‘lâm olundukda merkūm Mehmed cümle esnâf ma‘rifetiyle çarşıdan tard olunmuşidi deyu bi’l-cümle mazmûnu takrîrlerine mutâbık bir kıt‘a i‘lâm-ı şer‘î ibrâz ve fî-mâ-ba‘d mezbûrun çarşıya uğratılmamasını iltimâs ve niyâz etmeleriyle bu sûretle ahâlî-i çarşının sâye-i ma‘delet-vâye-i hazret-i hilâfet-penâhîde bu makūle habîsin def‘iyle âsâyiş ve istirâhatleri’çün niyâzlarına müsâade-i merâhim-âde-i seniyyeleri erzânî buyurulmak emr-i savâb idüğü İstanbul Mahkemesi’nden huzûr. Fî 8 Za sene [1]241