İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 89 Hüküm no: 50 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Topçu Ocağı neferlerinden Manastırlı Ahmed b. İbrahim’in kaybettiği tüfeğini, Humabarahâne mühendislerinden Ahmed Nazif Kalfa b. Mehmed Said’de bulduğu Tüfenk istihkāk da‘vâsı ve teslîme tenbîh Ma‘rûz Dergâh-ı âlî dâme masûnen bi’l-avni’r-Rabbânî Topçu Ocağı’nın ellinci cemâ‘atinden dördüncü top neferâtından Manastırlı Ahmed b. İbrahim meclis-i şer‘-i münîrde Humbarahâne-i ma‘mûre mühendislerinden Ahmed Nazif Kalfa b. Mehmed Said muvâcehesinde işbu meclis-i şer‘-i şerîfde mu‘âyene olunan karanfil ta‘bîr olunur sîmlice ve sedeflice bir tüfenk malım iken işbu târih-i i‘lâm şehri Zilka‘detü’ş-şerîfenin dokuzuncu Perşembe günü yedimden zâyi‘ edip hâlâ mezbûrun yedinde bulmamla bi’l-istihkāk taleb ederim deyu da‘vâ ettikde ol-dahi cevâbında zikr olunan tüfenge vaz‘-ı yedini ikrâr lâkin ben zikr olunan tüfenge târih-i i‘lâmdan yedi sene mukaddem mâliki olmuşdum deyu [19b] müdde‘î-i mezbûrun malı olduğunu inkâr etmeğin bu sûretde ber-muktezâ-yı şerî‘at-i garrâ mülk-i mutlak da‘vâsına târih-i gaybet mu‘teber olmayıp hâricin beyyinesi evlâ olmağla müdde‘î-i mezbûr Ahmed beyâna havâle olundukda ol-dahi ber-vech-i muharrer müdde‘âsını lede’t-tezkiyye adl ve makbûlü’ş-şehâde idükleri ihbâr olunan ocağ-ı mezkûrun birinci bölükde birinci top neferâtından Berâtlı Hüseyin b. Süleyman ve Tophane’de Çavuşbaşı Hamamı’nda Hamamcı Ali b. Yunus nâm kimesneler şehâdetleriyle bi’l-müvâcehe vech-i vecîh-i şer‘î üzere isbât ettikden sonra zikr olunan tüfengi bir vechile mülkünden ihrâc etmediğine merkūm Ahmed’e ber-nehc-i şer‘î yemîn dahi verilmeğin mûcebince zikri mürûr eden tüfengi mâliki idüğü şer‘an sâbit olan merkūm Ahmed’e teslîme mezbûr Ahmed Nazîf kalfaya tenbîh olunduğu İstanbul Mahkemesi’nden huzûr. Fî 22 Za sene [1]241