İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 90 Hüküm no: 51 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköy’de attarlık yaparak geçimini temin eden Agisi’yi, diğer Yahudi tüccarların meslekten men etmek istedikleri Agisi zimmî Ortaköy’de attârlık etmesine kimesne ta‘arruz etmemeğe tenbîh Mübârek rikâb-ı kamer-tâb-ı hazret-i cihândârîye takdîm-i arzuhâl eden Agisi v. Atam zimmî meclis-i şer‘-i münîrde attârân kethüdâsı es-Seyyid Mustafa Ağa ile Galata müzâfâtından Ortaköy’de vâkı‘ attâr tâifesinden Nesim ve Sebetay ve Mirkado ve Yuda ve Hayim ve Salamon yahudiler ve sâirleri muvâcehelerinde ben fukarâdan olmamla karye-i mezbûrede tedârük eylediğim bir bâb dükkânımda attârlık ile ticâret ve sâye-i merhamet-vâye-i hazret-i zıllullâhîde evlâd ve ıyâlim ile ta‘ayyüş etmek murâd eylediğimde Yehûd tâifesi mesfûrûn bi gayrı vech beni men‘ dâ‘iyesinde olmalarıyla suâl olunup mümâna‘atları men‘ olunmak niyâzımdır deyu istirhâm ve istid‘â ettikde evvelâ ber-muktezâ-yı şerî‘at-i garrâ ticâretden men‘ câiz olmadığından mâ‘adâ karye-i mezbûrede attâr esnâfı nizâmına dâir bir gûne kayd bulunmadığı baş muhâsebe ve ma‘den ve dîvân-ı hümâyûn kalemlerinden derkenâr olunmuş olmağla ol-vechile sâhib-i arzuhâl mersûmun ber-vech-i istid‘â ticâret ve ta‘ayyüş husûsuna şer‘an ve kānûnen mâni‘ olmadığından gayrı esnâf-ı merkūmûn dahi bizim müdde‘î-i mesfûrun karye-i mezbûrede attârlığına vechen-mine’l-vücûh dahl ve ta‘arruzumuz yokdur dedikleri İstanbul Mahkemesi’nden huzûr. Fî 6 Za sene [1]241