İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 90 Hüküm no: 52 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eminönü’nde Yeniçeri Ocağı’nın koruması altında fermana rağmen satış yapan altı adet sebzeci dükkânın, ocağın kaldırılmasıyla birlikte yıktırılarak ilga edildiği Eminönü’nde altı bâb sebzeci dükkânları hedm ve ilgāsı Ma‘rûz Bi-tevfîkillâhi Teâlâ padişah-ı İslâm-penâh eyyedehullâhi Teâlâ ve ebkāhu hazretlerinin âsâr-ı teveccüh ve tâcdârâneleriyle havene-i yeniçeriyânın nâm ve nişânları sahîfe-i rüzgârdan mahv ve ilgā ba‘de-zin hilâf-ı şer‘ ve nizâm olan her bir mevâddın rişte-i nizâma idrâcına dikkat ve i‘tinâ olunmakda olup ez-cümle mahzâ dâ‘iye-i ihtikâr ile Eminönü nâm mahalde vâkı‘ Mehmed Said ve Seyyid Ahmed Yazıcı ve Ali Reis oğlu Seyyid Hasan ve İmâm oğlu Seyyid İbrahim ve diğer Seyyid İbrahim ve Seyyid Mustafa Yazıcı nâm kesânın sâkin oldukları altı bâb dükkânda sebze bey‘i’çün Mihrişâh Vâlide Sultân tâbe serâhu [serâhâ] hazretlerinin vakfına tashîh ettirmişler iken cânib-i vakfa i‘tâ edecekleri icâreyi bundan akdem sebzeci esnâfı ta‘ahhüd ederek gedikleri bâ-hâtt-ı hümâyûn terkīn ve ilgā dört def‘a dekâkîn-i mezkûrenin dâhil ve hâricinde sebze bey‘ olunmamak üzere bâ-i‘lâm-ı fermân-ı âlî-şân ısdâr ve tescîl olunmuş iken tâife-i gayr-ı hâife-i yeniçeriyâna istinâden yine sebze bey‘inden memnû‘ olmaklıklarından zikr olunan dükkânların hedmi bâbında bu dâ‘îleriyle mi‘mâr ağa kullarına hitâben bâlâsı sahh-ı âlî ile müveşşah beyâz üzerine sâdır olan fermân-ı celîlü’ş-şâna imtisâlen dekâkîn-i mezkûre taraf-ı şer‘den memûr Mehmed Efendi bendeleri ve ağa-yı mûmâ-ileyh kulları ma‘rifetiyle külliyen hedm ve ref‘ ve ilgā olunup sâye-i inâyet-vâye-i hazret-i zıllullâhîde imâta-i ezâ kılındığı İstanbul Mahkemesi’nden huzûr-ı âlîlerine i‘lâm olundu. Fî 28 Za sene 1241