İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 93 Hüküm no: 55 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır tüccarından Hafız Tahir Efendi b. Selim’in, İskenderiyeli ortağından aldığı Yemen kahvesini, Nemçeli Anaçbo Berirvici’nin İstanbul’a nakletmediğini iddia ettiği 4 buçuk kantâr yemen kahvesi nizâ‘ı men‘i Ma‘rûz Sâdır olan fermân-ı âlîlerine imtisâlen işbu arzuhâl ve hâmişinde mastûr gümrük emîni izzetlü efendi bendelerinin i‘lâmına ba‘de’n-nazar Mısır tüccârından sâhib-i arzuhâl Hâfız Tahir Efendi b. Selim meclis-i şer‘-i münîrde derûn-ı arzuhâlde mastûru’l-ism Nemçeli Anaçbo Berirvici? nâm müste’men muvâcehesinde tercümânı Rap hâzır olduğu hâlde İskenderiye’de mukīm ‘ınânen şerîkim el-Hâc Ali Ağa’nın bundan akdem mal-ı müşterekimizden Deraliyye’de bana teslîm etmek üzere müste’men-i mesfûrun sefînesine ücret-i navul ile tahmîl eylediği bir ferde derûnunda mevzû‘ dört buçuk kantâr Yemen kahvesini müste’men-i mesfûr kabz edip el-hâletü hâzihî Deraliyye’ye geldikde bana teslîm etmemekle ol-mikdâr kahveyi müste’men-i mesfûrdan taleb ederim deyu da‘vâ ettikde ol-dahi cevâbında fi’l-vâkı‘ gāib-i mezbûr el-Hâc Ali Ağa müdde‘î-i mezbûr Hâfız Tahir Efendi’nin vech-i meşrûh üzere şerîki olduğunu ve mal-ı müştereklerinden ol-mikdâr kahvenin beher kantârını üçer buçuk guruş ücret-i navul ile İstanbul’a nakl için kabz ve sefînesine vaz‘ eylediğini ikrâr edip lâkin sefîne-i mezkûrem ile gelir iken Akdeniz’de İstanköy civârında Santorin adası önlerinde zikr olunan kahveyi sâir emvâl-i müslimîn ile ma‘an te‘addî ve taksîrim olmaksızın eşkıya-yı Rum tagallüben zabt ve ahz eyledi deyip bu sûretde ber-muktezâ-yı şerî‘at-i mutahhara husûs-ı mezbûrda müste’men-i mesfûr yemînle tasdîk olunur makūleden olmağla bi’t-taleb üzerine red ve damân lâzım olmadığına müste’men-i mesfûra bi’l-müvâcehe vech-i şer‘î üzere yemîn verilmeğin mûcebince müdde‘î-i mezbûr Hâfız Tahir Efendi da‘vâ-yı mezkûresiyle müste’men-i mesfûra bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 15 Za sene [12]41