Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 351 Hüküm no: 391 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Solak Mehmed Çelebi’nin câriyesi Mülâyim bt. Abdullah’ı azat etmesi Mahmiye-i İstanbul’da Hoca Üveys mahallesinde sâkine Fâtıma bt. Solak Mehmed Çelebi nâm hâtunun zevci ve tarafından husûs-ı âti’l-beyâna vekîl olduğu zât-ı mezbûru ma‘rifet-i şer‘iyye ile ârifân hammâmîler kethüdâsı Ahmed Ağa b. Mehmed ve Sâlih Çelebi b. Mahmud şehâdetleriyle şer‘an sâbit olan Osman Çavuş b. Mustafa meclis-i şer‘-i şerîf-i enverde bi’l-vekâle ikrâr-ı tâm ve takrîr-i kelâm edip müvekkile-i merkūme Fâtıma Hâtun kendiye rıkkını mu‘terife olan orta boylu açık kaşlı kara gözlü Rûsiyyetü’l-asl Mülâyim bt. Abdullah nâm câriye-i memlûkesini hasbeten lillâhi’l-meliki’l-Hallâk ve taleben li merzâti’l-kerîmi’r-Rezzâk malından tahrîr ve i‘tâk ve zümre-i harâir-i asliyyâta idrâc ve ilhâk eyledi ba‘de’l-yevm mevsûfe-i mezbûre Mülâyim sâir harâir-i asliyyât gibi hürre olup üzerinde velâ-i şer‘îden gayrı hakkı bâkī kal[ma]mışdır dedikde mâ hüve’l-vâki‘ bi’t-taleb ve’l-ibtigā ketb olundu. Fi’l-yevmi’r-râbi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Süleyman Beşe sekbân 16, sarrâcbaşı Mustafa Beşe sekbân 19, Musa Odabaşı sekbân 13, Mustafa Beşe b. ( ), Ali Beşe sekbân 13.