İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 94 Hüküm no: 57 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takuhi bt. Artin’in, Beyoğlu’nda mutasarrıf olduğu evi, Anna bt. Kirkor ile kocası Kirkor v. Tavit’e devrettiği Beyoğlu’nda Kamer Hatun Mahallesi’nde menzil ferâğı Ma‘rûz Nezâret-i hazret-i şeyhülislâm-ı sellemehü’s-selâmîde âsûde evkāfdan cennet-mekân firdevs-âşiyân merhûm ve mağfûrun-leh Sultân Bâyezid Hân-ı Velî tâbe serâhû hazretlerinin evkāf-ı şerîfeleri müsakkafâtından Kasım Paşa cibâyetine tâbi‘ Beyoğlu nâm mahalde Kamer Hatun mahallesinde vâkı‘ ma‘lûmü’l-hudûd bir bâb vakıf menzile bi’l-icâreteyn mutasarrıfe olan şahs-ı mu‘arrefe Takuhi bt. Artin nâm nasrâniye meclis-i şer‘-i münîrde Avrupa tüccârından kendi nefsinden asîl ve zevcesi Anna bt. Kirkor nasrâniye tarafından husûs-ı âtîde tasdîke vekîl-i şer‘îsi Kirkor v. Tavit zimmî muvâcehesinde mersûme Takuhi nasrâniyenin li-ebeveyn kız karındaşı mu‘arrefetü’ş-şahs Varuhi nâm nasrâniye ile ancak mersûme Varuhi’den bâ-i‘lâm-ı şer‘î mahkûmun-bih sekiz yüz guruş taleb eden Kegork v. Kabril ve mersûmetân Takuhi ve Varuhi zimmetlerinde kezâlik bâ-i‘lâmât-ı şer‘iyye mahkûmun-bih bi’l-iştirâk dâyinlerinden bin guruş taleb eden Asker oğlu Andon v. Artin tarafından zikri [zikr-i] âtî husûsu tasdîke vekîl-i şer‘îsi Kuyumcu Avanes v. Bedros ve iki bin iki yüz seksen guruş taleb eden Varuhi bt. Bağdısar nasrâniye tarafından vekîl-i şer‘îsi zevci İstefan v. Hırabit zimmî bin yüz yetmiş dokuz guruş taleb eden Toros ve Bedros v. Manok zimmîler ile kız karındaşları şahısları mu‘arrefe Lüsyen ve diğer Varuhi nasrâniyeler <> taraflarından tasdîka vekîl-i şer‘îleri Halebân? Hanna v. Haçer zimmî ve bin altı yüz elli guruş taleb eden Karyabet bt. Artin ve Serpohi bt. Avanes nasrâniyeler taraflarından vekîl-i şer‘îleri Artin v. Yosef ve bin yüz yetmiş guruş taleb eden Mariya bt. Nikogos nasrâniye tarafından oğlu ve vekîl-i şer‘îsi mersûm Kuyumcu Avanes ve bin yüz kırk guruş taleb eden Hindistanlı Kızı demekle şehîre Lüsye bt. Atam nasrâniye tarafından vekîl-i şer‘îsi mersûm Hanna ve beş yüz altmış sekiz guruşdan bâkī üç yüz elli üç guruş taleb eden Bericek bt. <> Podos nasrâniyenin vekîl-i şer‘îsi mersûm Hanna hâzır oldukları halde benim ber-minvâl-i muharrer müstakillen deynim olan sekiz yüz guruş ile kız karındaşım hâzıra-i mezbûre ile bi’l-iştirâki’s-seviy zimmetimizden sahîhan mahkûmun-bih deynimiz olan min-haysü’l-mecmû‘ on dört bin üç yüz altmış iki guruşu dâyinlerimiz mersûmûna tamâmen ve kâmilen edâ ve îfâ onlar dahi yedimizden ve malımızdan ahz ve istîfâ edip ve sâlifü’z-zikr benim müstakillen bi’l-icâreteyn bâ-temessük-i mütevellî taht-ı tasarrufumda olan menzili dahi hüsn-i rızâ ve ferâğ-ı kat‘î-i mu‘teber ile makbûzum olan bedel-i ma‘lûme ve mersûm Kirkor ile zevcesi Anna’ya ale’l-iştirâki’s-seviyy bâ-ma‘rifet-i mütevellî ferâğ ve kasr-ı yed eylediğimde onlar dahi tefevvüz ve kabûl edip menzil-i mahdûd-ı mezkûrun ferâğında şurût-ı müfside da‘vâsına müte‘allika âmme-i da‘vâdan ben zevcân-ı mersûmânın zimmetlerini onlar dahi bedel-i mezkûrun adem-i istîfâsına müte‘allıka da‘vâdan benim zimmetimi kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve ıskāt eyledik deyu mukırre-i mezbûre Takuhi nasrâniyenin bi’l-cümle kelimât-ı meşrûhasını mersûm Kirkor ile kız karındaşı hâzıra-i mersûme Varuhi nasrâniye ve hâzirûn-ı asîl ve vükelâ-i mersûmûndan her biri bi’l-asâle ve bi’l-vekâle tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî Gurre-i Z sene [1]241