İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 97 Hüküm no: 62 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatih Camii civarındaki bakkal dükkânının ortaklarından Vasil v. Mihal’in, ortağı Karalim v. Apostol’e olan borcunu ödediği 783 Guruş İstîfâ ve İbrâsı Ma‘rûz Âsitâne-i aliyyede vâkı‘ bakkal tâifesinden Vasil v. Mihal zimmî meclis-i şer‘-i münîrde tâife-i merkūmeden derûn-ı arzuhâlde mersûmu’l-ism Karalim v. Apostol zimmî muvâcehesinde İstanbul’da Ebu’l-Feth Sultan Mehmed Hân Hazretleri Câmi‘-i Şerîfi civârında Taşçılar Hânı nâm mahalde kâin sipâhî dükkânı demekle meşhûr bir bâb bakkal dükkânı derûnunda mevcûde gedik âlâtının nısfı benim ve nısfı dahi mersûm Karalim zimmînin olarak şerîk olmamızla dükkân-ı mezkûr derûnunda mevcûde malımdan mersûm Karalim zimmînin benim yedimden iştirâ ve kabz eylediği bâ-defter-i müfredât zehâir-i mütenevvi‘a esmânından alacak hakkım olan yedi yüz seksen üç guruşu tüccârdan ma‘lûmü’l-esâmî kimesnelere edâ etmek üzere şerâitiyle bi’l-müvâcehe havâle eylediğimde ol-dahi kabûl ve cümlesine edâ ve îfâ etmekle fî-mâ-ba‘d benim mersûm Karalim zimmî zimmetinde onun dahi benim zimmetimde kat‘an hakkımız kalmamağın bi’l-cümle [22a] husûs-ı mezkûre ve sâir cemî‘-i hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyu mukırr-ı mersûm Vasil zimmînin bi’l-cümle takrîr-i meşrûhunu mersûm Karalim zimmî tasdîk ve bu vechile külliyen kat‘-ı nizâ‘ eyledikleri İstanbul Mahkemesi’nden huzûr. Fî 2 Z sene 1241